W Miłorazu je so dźensa termin sakskeho statneho ministra za energiju, škit klimy, wobswět a ratarstwo, Wolframa Günthera, wotměł. Tež předsyda Domowiny, Dawid Statnik, je so wobdźělił a so po tym wupraja:„Dožiwjamy na městnje bolostne konflikty, pod kotrymiž ćerpimy. Wulka politika je tute konflikty do našich małych wjesnych cyłkow přinjesła. Domowina je wotbagrowanje w lětstotkach zrosćenych serbskich wjeskow za potrjebu energije přeco a zasadnje wotpokazała. Zdobom smy so wo to starali, zo móžachu susodźa w padźe přesydlenja hromadźe wostać. Dokelž serbska rěč a kultura stej w stabilnych socialnych strukturach žiwej.W Miłorazu so cyła roztorhanosć w brunicowym rewěrje pokazuje. Jedni chcedźa so na kóždy pad přesydlić, tež zo bychu poćeženjam so bližaceje jamy wućekli, a swoje domy a ležownosće předawaja. Druzy chcedźa na kóždy pad wostać a sej wokolinu swojeho domu wobchować. Wězo sej přejemy, zo stej a wostawatej wobě opciji móžnej. Poručenja komisije za rozrost, změnu struktury a dźěło a wobzamknjenje zakonja wo skónčenju zmilinjenja brunicy w zwjazkowym sejmje su dalše puće postajili.Smy so jako třěšny zwjazk Serbow přeco za srjedźodobny wustup z wudobywanja wuhla wuprajili, kaž je wón mjeztym schwaleny.Tohodla namołwjam, diferency w energijowej politice na domoródnu ludnosć njewotwaleć. Mnozy ludźo w regionje su prosće na čuwy hotowi. Domowina aktiwnje w gremijach sobu skutkuje, kotrež aktualnu změnu strukturow přewodźuja. Dokelž to serbske njeje pad za muzej, ale eliksěr za žiwjenje regiona dźensa a jutře – a za dobu bjez tučasneje bolostneje roztorhanosće.”