K rozsudej sakskeho kultusoweho ministra Christiana Piwarza po dźensnišim wuradźowanju w kultusowym ministerstwje w Drježdźanach, zo změje kóžda ze serbskeju wyšeju šulow w Ralbicach a Worklecach w šulskim lěće 2020/21 dwě rjadowni w pjatym lětniku, so předsyda Domowiny, Dawid Statnik, wupraja:„Wosebje potrjechenym staršim a jich dźěćom je to wulke wolóženje. Z tym móža tule wšitcy do serbskeje šule chodźić, kotraž jim so chce. To tyje swójbam, kotrež su so wědomje za kubłanje na wysokim maćernorěčnym niwowje rozsudźili. To zdobom naše rěčne rumy posylnja.Ja so potrjechenymaj gmejnomaj Worklecam a Ralbicam-Róžantej a jeju wjesnjanostomaj, komunalnym politikarjam, šulomaj, reginalnemu zapósłancej Sakskeho krajneho sejma Alojsej Mikławškej (CDU), Serbskemu šulskemu towarstwu a wězo angažowanym staršim dźakuju, zo smy ze zhromadnosću, rozsudźenosću a přeswědčacu wěcownosć tón wuslědk docpěli. Wjeselu so, zo je kultusowy minister z jasnym słowom čas njewěstosćow skónčił.To je runje pod ćežkimi wuměnjenjemi korona-krizy pozbudźace znamjo. Wone zdobom nastajenju našeho třěšneho zwjazka wotpowěduje, so konsekwentnje na dialog a dobru wolu wusměrjeć. Tohodla je to tež wuraz němsko-serbskeje kooperacije nic jenož we Łužicy.”