Katrin Suchec-Dźisławkowa, referentka Domowiny za kubłanje a spěchowanje dorosta, je zašły tydźeń hromadźe z nawodnicu Rěčneho centruma Witaj, dr. Beatu Brězanowej, a městopředsydu třěšneho zwjazka Markom Hančikom spěchowansku wučbu w ramiku statneho programa „Nachwatanje po koronje za dźěći a młodostnych” na Radworskej zakładnej šuli startowała. Suchec-Dźisławkowa so k tomu a dalšemu postupowanju w Serbach we wobłuku tuteje akcije wupraja:

„Tež wuwučowanje našeje maćeršćiny je pod wuměnjenjemi pandemije zdźěla wulke straty poćerpjeło. To potrjechi wosebje dźěći, kotrychž starši su so wědomje za serbsku šulu rozsudźili, byrnjež sami při nawuknjenju serbšćiny wjele pomhać njemóhli. Hladajo na lěto a wjac pobrachowacych wučerjow-serbšćinarjow je serbska ciwilna towaršnosć wužadana, sama młodym nošerjam přichoda serbskeho ludu poboku być.

Wjeselu so, zo je dale a wjac šulow, hdźež woni tuchwilu pomocnikow zapřijeja resp. tajkule podpěru přihotuja. Njemóžemy a nochcemy wučerjow narunać, ale jich wšědnu prócu z přidatnym poskitkom přewodźeć. Woni móža tež najlěpje konkretnu potrjebu za jednotliwe dźěći pohódnoćić. Prošu tohodla wšěch potencielnych zajimcow, wosebje wězo tež hibićiwych wuměnkarjow, kiž rady z dźěćimi wochadźeja, so přizjewić.

Domowina při sposrědkowanju městnosće skutkowanja pomha a wo konkretnych kondicijach informuje. So wě, zo maja so aktualne hamtske korona-postajenja w zajimje strowoty wšěch wobdźělnikow kruće a kedźbliwje dodźeržeć. – Kontakt: katrin.suchec-dzislawkowa@domowina.de

tel.: (03591) 550-104.