Předsydstwo župy „Handrij Zejler“ je na swojim posedźenju srjedu wječor konkluzije z aktualneho wuwića korony w našich kónčinach sćahnyło a serbske popołdnjo za swójby, kiž bě 7. nowembra w Krabatowym młynje w Čornym Chołmcu planowane, na čas po pandemiji přestorčiło. Čłonojo gremija su so na zwoprawdźenje swojeju wuspěšneju projektow we wubědźowanju „Čiń sobu” koncentrowali. Tak chce regionalna rěčnica Sonja Hrjehorjowa w ramiku projekta „Serbska kulturna a zetkawanska bróžeń – Domowinski dom Wojerecy“ tež runinu za walkowanje jejkow zaměstnić. Za klětu su zarjadowanja kaž hudźbno-literarne popołdnjo předwidźane. Hladajo na projekt „Žiwa kuzłarska křinja serbskich bajkow, bajow a powědančkow“ přihotuja wubědźowanje šulerjow: Zaměr je swobodne powědanje dźěći na zakładźe wobrazow z motiwami powěsćow. Župa chce so na kubłanskimaj jězbomaj Budyskeje župy 2021 a 2022 na slědach Zejlerja a Kocora wobdźělić a wosebje składnostnje Lěta župow wuměnu ze wšelakimi regionami pěstować. Hłowna a wólbna zhromadźizna župy budźe klětu 5. małeho róžka na žurli Kulturneje fabriki w domje, hdźež je so Domowina załožiła. Chcedźa šěrše wobdźělenje z towarstwow hač dotal zmóžnić a tohodla simultane přełožowanje poskićić. Přiwšěm ma so serbšćina jako jednanska rěč narodneje organizacije z rěčnymi rumami skrućić, tohodla wostanu dosahace rěčne znajomosće z wuměnjenjom za sobudźěło w župnym předsydstwje.