Chrósćicy. Domowina organizuje klětu konferencu k strukturnemu wuwiću we Łužicy. Dźěłowy wuběrk za hospodarstwo a infrastrukturu předpołoži zwjazkowemu předsydstwu hač do kónca tutoho lěta namjet za termin, městnosć, wotběh a kóšty. To wobzamkny zwjazkowe předsydstwo na swojim 2. rjadnym posedźenju, kiž wotmě so pod nawodom předsydy Domowiny Dawida Statnika 15.9.2017 wječor w Chrósćicach. W diskusiji podachu čłonojo dalše namjety, na přikład pokazachu na trěbnosć wuwaženosće referentow mjez politikarjemi a wědomostnikami. Wulki zajim zbudźi přednošk na temu “#Chemiewende a što to za Łužicu woznamjenja” studenta chemije a čłona zwjazkoweho předsydstwa Maximiliana Hasackeho. Hladajo na to, zo trjebamy w přichodźe wjace čistych industrijow (“zeleneje chemije”), za kotrež pak infrastruktura data njeje, měł so we Łužicy inowaciski centrum załožić, kiž skića tak mjenowanym start-ups labory a infrastrukturu. Jeho hesłu “Dajće nam Łužicu k pućrubarjej čisteho přichoda wuwić” mnozy přihłosowachu runje tak kaž namjetej Kita Ele, zaso forum za studentow organizować, hdźež dóstanu składnosć, swoje ideje předstajić. Tute mysle chcedźa do přihotow konferencu k strukturnemu wuwiću we Łužicy tohorunja zapřijeć.Dalša tema běchu wólby Zwjazkoweho sejma. Zwjazkowe předsydstwo je so zaběrało z wotmołwami na wólbne kopolaki mjeńšinoweje rady a Domowiny a zwěsćiło, zo so wosebje ze stron AfD aktualne prócowanja Serbow njepodpěraja. Zwjazkowe předsydstwo napomina wšěch wólbokmanych, zo bychu wolili a tak demokratiske wuwiće w tutym kraju podpěrali. Domowina je wotpowědne naprašniki pósłała 32 kandidatam z pjeć wólbnych wokrjesow. Wotmołwy je Domowina na swojej web-stronje wozjewiła.Dale wobzamkny zwjazkowe předsydstwo čłonstwo a powoła předsydow a městopředsydow šěsć fachowych wuběrkow zwjazkoweho předsydstwa. Wuběrki maja zwjazkowemu předsydstwu na přichodnym rjadnym posedźenju dnja 10.11.2017 namjet za tematiske rozrjadowanje dźěłowych směrnicow předpołožić, to rěka wopisać wobłuk, za kotryž widźa so woni zamołwići. Nimo tuchwilnych čłonow móže zwjazkowe předsydstwo dalšich fachowcow jako čłonow powołać. Woni maja do posedźenja zwjazkoweho předsydstwa předłohi wobjednać a je tak lěpje hač dotal přihotować. Dźěłowe směrnicy je zašła hłowna zhromadźizna kónc měrca wobzamknyła.Zwjazkowe předsydstwo je přihłosowało aktualizowanemu kooperaciskemu zrěčenju mjez třěšnym zwjazkom a župu Delnja Łužica, kiž je z wjace hač 2.300 čłonami po ličbje najwjetše čłonske towarstwo Domowiny. K změnam słuša na přikład, zo wotměje so – město dotal jónu – dwójce wob lěto zhromadne wuradźowanje župneho předsydstwa a prezidija.Nastupajo předwidźanu wokrjesnu reformu w Braniborskej informowaše zastupowacy jednaćel Domowiny a čłon Braniborskeje Serbskeje rady Marcus Końcaŕ wo stejišću Serbskeje rady k zakonjej k wokrjesnej reformje. Kritisce widźi rada při tym hrožacu marginalizaciju serbskeho ludu a serbskich zajimow w nowych wjetšich cyłkach runje tak kaž dotal njerjadowane zapołoženje hłownohamtskich zamołwitych za serbske naležnosće. Dale pomina rada, zo maja so zamołwite za serbske naležnosće kruće do fuzijskich gremijow zapřijeć, štož dotal předwidźane njeje. Tež Domowina a župa Delnja Łužica chcetej so hišće k tomu wuprajić.Dawid Statnik informowaše wo stawje zběranja podpismow za europsku mjeńšinowu iniciatiwu Minority SafePack, za kotruž chce Domowina na wšěch zarjadowanjach aktiwnje wabić. Za to pak pominachu sej přitomni jadriwe hesło, z kotrymž móža ludźi přeswědčić, so do lisćiny zapisać. Namjetej Marje Michałkoweje “Za runoprawosć awtochtonych mjeńšin w Europje” jako hesło we Łužicy mnozy přihłosowachu. Podpismowa akcija běži hišće hač do 2.4.2018. W Němskej móže kóždy wólbokmany podpisać. Lisćiny předleža w zarjadomaj Domowiny w Budyšinje a Choćebuzu, we wšěch regionalnych běrowach a buchu w aktualnym čisle “Naša Domowina” wozjewjene (www.domowina.de, mediateka). Nimo toho je digitalne podpisanje móžno, a to pod http://www.domowina.de/hsb/aktualnosce/minority-safe-pack/.Wo aktualnym stawje młodźinskeho socialneho dźěła informowaše wjednica Rěčneho centruma Witaj (RCW) dr. Beata Brězanowa. Tute je rozrostło a wukonja so mjeztym na 4 serbskich wyšich šulach, a to w Budyšinje, Worklecach, Radworju a Kulowje, kaž tež w regionalnym socialnym teamje Budyšin w formje mobilneho młodźinskeho dźěła. W Kamjenskej kónčinje budźe so městno mobilneho socialneho dźěła najpozdźišo w nowym lěće wobsadźić.Domowina wita zahajenje wubědźowanja “Sprachenfreundliche Kommune – serbska rěc jo zywa” w Braniborskej a namołwja komuny, so wobdźělić. W Sakskej běži tute wubědźowanje hišće hač do kónca lěta. Kaž čłonka zwjazkoweho předsydstwa a předsydka Sakskeje Serbskeje rady Marja Michałkowa praji, planuje prezident krajneho sejma dr. Matthias Rößler 20.10.2017 jězbu po gmejnach, hdźež chce hišće raz za tute wubědźowanje wabić.