K swojemu kónclětnemu posedźenju zetka so prezidij Domowiny dnja 13.12.2017 w Dešnje.W prěnim dźělu posedźenja zetkachu so z předsydstwom župy Delnja Łužica. Zetkanje přewjedźe so na zakładźe kooperaciskeho zrěčenja dwójce wob lěto.Čłonam župneho předsydstwa předstajichu aktualny staw planowanja strukturneje konferency Domowiny, kotraž planuje so za srjedź septembra přichodneho lěta.Zdobom dojednachu so přitomni nastupajo planowanja a přesadźenja zarjadowanja k šulskim temam Delnjeje Łužicy. Nastork k tomu je župne předsydstwo dało. Přitomni podšmórnychu swoje žadanje, zo so serbske gremije při wozjewjenju a wuhódnoćenju ewaluacije WITAJ-wučby w Delnjej Łužicy, kotruž tučasnje Institut JSmoin z pomocu Instituta za Sorabistiku w nadawku ministerstwa MBJS přewjedźe, z časom zapřija. Statnik k tomu: “Ewaluacija WITAJ je wažny krok za analyzu šulstwa w Delnjej Łužicy. Tuta ma so zjawnje diskutować, zo bychmy z toho kmane naprawy za zdźerženje delnjoserbšćiny wotwjesć móhli.”Zetkanju slědowaše regularne posedźenje prezidija. Prezidij Domowiny dźakuje so Serbskimaj radomaj Sakskeje a Braniborskeje za podpěrowanje iniciatiwy Minority SafePack. Zdobom dźakuja so čłonojo statnej sekretarce a społnomócnjenej za naležnosće Serbow w Braniborskej dr. Ulrike Gutheil, kotraž tež iniciatiwu podpěra. “MSPI podpěraja mjeztym wjac hač 350.000 ludźi. Wjeselu so, zo tež naši politikarjo so tutomu hibanju přizamknu”, praji předsyda Domowiny Dawid Statnik.Dale gratuluje prezidij Domowiny nowemu ministerskemu prezidentej Sakskeje, Michaelej Kretschmerej, kiž bě, tak Statnik, Domowinje jako zapósłanc wažny a dobry partner: “Wjeselimy so na zhromadne dźěło a nadźijamy so na pokročowanje dotalnych dobrych nazhonjenjow.”Přichodne posedźenje prezidija Domowiny přewjedźe so 17.01.2018. Přichodne posedźenje zwjazkoweho předsydstwa wotměje so dnja 23.02.2018 – zajimcy su wutrobnje witani.Wjace informacijow pod www.domowina.deInformacije k MSPi: www.minority-safepack.eu