Na swojim posedźenju srjedu, 21.9., wječor w Chrósćicach su čłonojo předsydstwa župy „Michał Hórnik” projekty a zarjadowanja hač do kónca lěta dorěčeli a plan klětušich projektow nastajili. Wutoru, 15. nazymnika/nowembra, zarjaduje župa zhromadnje z wjesnym towarstwom „Při skale“ Hórki župnu kulturnu kermušku ze skupinu Poštyrjoch na Smolic statoku w Hórkach. Nimo toho so spočatk nazymnika přichodne zetkanje hotowarničow w Chrósćicach wotměje, informuje regionalna rěčnica Katharina Jurkowa.

Na wuradźowanju w Chróšćan gmejnskim a kulturnym centrumje su so kružkej swójbow farskeje wikarije a młodźinskemu klubej Pančicy-Kukow za wuběrne přihotowanje a zastaranje filmoweho wječora spočatk požnjenca z premjeru serbskeje synchronizacije dźěćaceho filma „Mała wjera” dźakowali. Tež dobry wothłós na hru „Mór a lubosć” w Chrósćicach ze 150 lajskimi dźiwadźelnikami na jewišću a ze sto dalšimi akterami za nim su wjesele rozjimali, wšako běše projekt Towarstwa Cyrila a Metoda (TCM) a partnerow tež wosebity wuraz bohateho serbskeho žiwjenja na teritoriju župy „Michał Hórnik”.