Předsydstwo župy „Handrij Zejler” Wojerecy je so wutoru nawječor (7.12.) prěni raz digitalnje zešło. Čłonojo dojednachu so na slědowace klětuše projekty: pokročowanje zetkanjow „serbowanje we wšědnym zjawnym žiwjenju Wojerec” a nowy rjad zarjadowanjow resp. dźěłarničkow pod hesłom „regionalna pisanosć rěče, drastow a kultury su žórła serbskeje identity”, kotrež tež zachowanju a wožiwjenju wjesnych dialektow a jich swojoraznych rěčnych wobrotow słuža. Wobaj projektaj stej we wubědźowanju „Rěč wjaza” Załožby za serbski lud wuznamjenjenej.

Dale steja dźěłarnička za wušiwanje hawbow a tykanje sačkow, popołdnjo za swójby a dwuměsačne zarjadowanja za dźěći k temje nałožki we wšelakich počasach we Wojerowskim domje Domowiny na lětnym planje. Nimo toho chcedźa wobydlerjam Noweho Města serbski wječork poskićić. Dale su sej čłonojo předsydstwa informacije wo lokalnych wjerškach wuměnili a so wo Lěće Zejlerja a Kocora informowali. Prěnje posedźenje župneho předsydstwa klětu budźe 20. wulkeho róžka w domje Domowiny.  

Regionalna rěčnica Sonja Hrjehorjowa wo wuslědkach kamishibai-wubědźowanja župy a wo rozsudźe juryje z cyłeje Łužicy informowaše: 1. městno Mila Kochojc, Annalena Hurras a Laraine Hengmith (wšitke z Choćebuza) za „Kralojske kócki”; 2. městno Charlotte Meise, Lara Annabell Hussock (wobě z Choćebuza) a Emmy-Li Urban z Bórkowow za „Kak su lutki na koronu trjefili”, a Jessica Konzack (z Chóćebuza) a Valerie Francesca Hering z Łojowa / Groß Luja (Grodk) za „Sněžeńka a sedym lutkow”. Jeničce šulerki delnjoserbskeho gymnazija su so wobdźělili, „su sej bajku wumyslili a při tym wušiknje z bohatstwa elementow serbskich powěsćow čerpali, su wobrazy zestajeli a z toho film činili – na tute wašnje su jara spodobne wěcki nastali.” Čłonojo župneho předsydstwa chwalachu tež jich dobru fonetiku a rěčnu kwalitu prezentacijow.