Zwjazkowe předsydstwo Domowiny je so dźensa, 02. junija, w Choćebuzu k swojemu prěnjemu rjadnemu posedźenju zešło. Wuradźowanje nawjedowaše předsyda Domowiny Dawid Statnik. Na spočatku wopominachu čłonojo gremija wotbagrowanju wjeskow. W krótkej narěči rysowaše předsyda Domowiny dotalne wuwiće, kotrež wjedźeše z lěta 1924 sem k cyłkownemu abo dźělnemu wotbagrowanju 87 wjeskow a 50 wjesnych dźělow.

Wjace hač 25.000 wobydlerjow přewažnje serbskich sydlišćow dyrbješe so přesydlić, štož serbsku substancu wosebje w srjedźnej a Delnjej Łužicy drastisce pomjeńša. Předsyda wabješe zdobom za to, zo měli, za nětčišu skutkowansku dobu předwidźanu brunicowu konferencu, wosebje pod znamjenjom strukturneje změny a zmištrowanja hospodarskeho přeměnjenja wusměrić. W diskusiji wuzběhny čłon gremija Jan Bělk, zo aktualne a globalne wuwiće njedodźerženja klimoweho dojednanja hrozy być dalši strach za našu towaršnosć.

Městopředsyda Domowiny a župan župy Delnja Łužica Wylem Janhoefer informowaše přitomnych wo rozsudźe hłowneho wuběrka Braniborskeho krajneho sejma. Po tym, zo bě Serbska rada w zašłym lěće 33 próstwow wo pruwowanje přisłušnosće komunow k serbskemu sydlenskemu rumej stajiła, je po rozsudźe hłowneho wuběrka nětko 43 gmejnow a městow přisłušacych k serbskemu sydlenskemu rumej w Braniborskej.

Zwjazkowe předsydstwo Domowiny dźakuje so wšitkim čestnohamtsce a hłownohamtsce skutkowacym, kotřiž su tutón stawiznisce wažny rozsud zeskutkownili. Wosebje dźakuje so Serbskej radźe, župje Delnja Łužica, regionalnemu běrowej Domowiny w Choćebuzu, a ministerstwu za wědomosć, slědźenje a kulturu. Zdobom wobžaruja čłonojo negatiwny rozsud k městu Luboraz, wočakuja pak, zo so šulski poskitk serbšćiny dale zdźerži.

Jako přewšo pozitiwnje wuzběhnychu čłonojo gremija třěšneho zwjazka dźensnišu debatu Zwjazkoweho sejma Němskeje pod titulom “25 lět europska karta regionalnych abo mjeńšinowych rěčow – zhromadny nadawk”. Čłonka Zwjazkoweho předsydstwa Domowiny a Zwjazkoweho sejma Němskeje, Marija Michałkowa (CDU), rozjimaše wuwiće a wobsah papjery. W tutej so wuwića zašłych 25 lět rysuja, dotalne wuslědki krajneje a zwjazkoweje runiny witaja a dalše naprawy wobzamknu. Tak da Zwjazkowy sejm Němskeje knježerstwu nadawk, mjez druhim pruwować, hač hodźi so wotpowědny zakoń tak nowelěrować, zo móhło so Serbam wužiwanje žónskich sufiksow mjenow zmóžnić. (Hlej k tym tež rozprawnistwo mjeńšinoweho sekretariata z Berlina.) Statnik k plenarnej debaće: “Wobsah a rozsudy su wuspěch wjelelětneho dźěła wjacorych. Dźakujemy so wosebje mjeńšinowemu sekretariaće, mjeńšinowej radźe, Zwjazkowemu ministerstwu nutřkowneho, społnomócnjenemu zwjazkoweho knježerstwa za naležnosće wusydlencow a narodne mjeńšiny, Hartmutej Koschykej a zapósłancam zwjazkoweho sejma. Hnujace bě, słyšeć w ramiku plenarneje debaty tež našu maćeršćinu. Je to mócny signal za runoprawnosću našeho naroda.”    

Dalše temy posedźenja běchu hospodarski plan 2017 a naćisk lěta 2018, staw nowelěrowanja Postajenja wo šulskich kubłanskich naležnosćach Serbow (Serbske šulske postajenje – SŠP / Sorben/Wenden-Schulverordnung), wólby do Zwjazkoweho sejma Němskeje a wuslědki lětušeho FUEN-kongresa. 

Jako jara konstruktiwna wopokaza so diskusija wo europskej byrgarskej iniciatiwje “Minority Safepack”. Čłonojo gremija mjenowachu wjacore namjety k wobwabjenju iniciatiwy. Viceprezident FUEN a čłon zwjazkoweho předsydstwa Bjarnat Cyž namjetowaše dźěłowu skupinu wutworić a hižo za čas folklorneho festiwala za podpisma wabić. 

Přichodne posedźenje Zwjazkoweho předsydstwa wotměła so pjatk, 15. septembra, na teritoriju župy Jakub Lorenc-Zalěski. Dokładniše informacije slěduja. Zajimcy su wutrobnje přeprošeni.