K 20. róčnicy Chróšćan zběžka 9. žnjenca (awgusta) so předsyda Domowiny, Dawid Statnik, wupraja:

„Póndźelu, 9.8., budźe tomu 20 lět, zo je farar Clemens Hrjehor po kemšach na spočatku šulskeho lěta šulerjow 5. lětnika do Chróšćan srjedźneje šule wjedł – přećiwo woli kultusoweho ministerstwa, kotrež chcyše šulu zawrěć. Z tym bu ,Chróšćan zběžk’ zahajeny, najsylniša manifestacija serbskeho narodneho wědomja w nowšich stawiznach našeho ludu. Ani Chróšćan ani Pančan serbsku srjedźnu šulu we wonych lětach zachować njemóžachmy, smy hórku poražku poćerpjeli, kotraž je hač do dźensnišeho na škodu rěčneje substancy. Tohodla je nam 9.8.2021 dźeń ćicheho wopominanja wulkeho solidariskeho wojowanja 2001 hromadźe z našimi přećelemi z tu- a wukraja.

Zdobom chcemy runje lětsa wosrjedź doby změny strukturow tež kubłanskopolitisce do přichoda hladać: 2001 su wšě generacije, šulerjo, starši, wučerjo, swójby a angažowani podpěraćeljo ,zjawny rěčny rum’ jako klučowe hesło zhromadneho prócowanja wo byće a traće Serbstwa do politiskeje debaty přinjesli. Dźensa je zdźerženje a wozrodźenje regionalnych rěčnych rumow politisce a towaršnostnje připóznata strategija za tworjenje přichoda serbskeho ludu. Tohodla steji prěni šulski dźeń po lětušich prózdninach pod znamjenjom ,Běchmy, smy, budźemy’. Wšitcy su wutrobnje přeprošeni, 6. požnjenca (septembra) nawječor w Chrósćicach hromadźe spominać a do přichoda hladać. Na česć njeboh fararja Clemensa Hrjehorja a k wužitkej serbskeho ludu.”

 https://domowina.blog/2021/07/20/bechmy-smy-budzemy-20-rocnica-chroscan-zbezka/