Na swojej dźensnišej adwentničce je sej prezidij Domowiny do Ptačec dojěł. Nawodnica tamnišeje šulskeje a domizniskeje stwy Martina Petschikowa wjedźeše po muzeju a powědaše wo zajimawostkach.

Domizniski muzej, kotryž zhladuje na wjace hač 20-lětne wobstaće, móže swojim wopytowarjam dypkownje do hód hišće nowostku prezentować. W poslednich tydźenjach je na iniciatiwu rěčneje motiwatorki Marije Šołćic nastał nowy medialny poskitk muzeja. Wotnětka je móžno, stawizny w serbskej rěči z pomocu techniki booki-pisaka dožiwjeć.  

Po wopyće domizniskeje stwy podachu so přitomni do wjesneje cyrkwje. Blunjanski farar dr. Stefan Reichelt jich tam witaše a zhromadnje swjećachu nutrnosć w serbskej rěči.

Na swojim poslednim lětušim posedźenju je so prezidij Domowiny mjez druhim z rezimejom nazymskich koncertow zaběrał, kotrež běchu z něhdźe 1000 wopytowarjemi na 11 koncertow wuspěšne [hlej přidatna zdźělenka medijam k tomu]. Dale je so prezidij na lěto 2024 přihotował, mjez druhim zaběraše so z wólbami do serbskeju radow a wólbami do krajneju sejmow w Sakskej a Braniborskej. Zdobom schwali prezidij plan župneje pawšale 2024 za prěnje tři kwartale.

Přichodne posedźenje prezidija klětu budźe 23. januara.