Na dźensnišim zeńdźenju předsydy Domowiny ze zastupjerjemi Domowinskich župow a towarstwow w Budyšinje wobdźěli so 14 wot 18 čłonskich cyłkow.

Na wosom-dypkowej agendźe steješe mjez druhim aktualny naćisk programa Domowiny, kotryž bu njedawno wozjewjeny. Hač namjety za konkretizowanje wobsaha abo tež hišće wotewrjene prašenja – naćisk so hižo w mnoho kruhach diskutuje. Hač do 12.04.2024 je za zjawnosć móžno, namjety k naćiskej zapodać.

Tež klětuša hłowna (wólbna) zhromadźizna Domowiny, kotraž budźe 5. apryla 2025 na teritoriju Budyskeje župy “Jan Arnošt Smoler” steješe na planje. Předsyda Dawid Statnik kaž tež jednaćelka Judit Šołćina namołwještaj přitomnych, w swojich župach a towarstwach za to wabić, w gremijach třěšneho zwjazka sobu skutkować. Dale rozmołwjachu so wo wobjimje rozprawnistwa. Přitomni přeja sej skrótšene, digitalne, ale někotři tež wučisćane materialije. Nastupajo wužiwanja digitalnych programow chce zarjad pruwować, hač móhli čłonske župy a towarstwa w přichodźe infrastrukturu Domowiny wužiwać.

Přitomni diskutowachu dale wo aktualnym diskursu nastupajo wójnu mjez Ruskej a Ukrainy. Prašenje je, hač měł so třěšny zwjazk tomu wuprajić.