K nowemu póstajenju narownanja kostow za serbske nastupnosći, kótarež jo bramborske krajne kněžaŕstwo na naraźenje ministaŕki za kulturu Manja Schüle na drogu spórało, stej se wugroniłej Kathrin Šwjelina, pśedsedaŕka Rady za serbske nastupnosći Bramborskeje a cłonk Zwězkowego pśedsedaŕstwa Domowiny, a Dawid Statnik, pśedsedaŕ Domowiny: „Jo to pśipóznaśe za naš lud a dalšny kšac do pšawego směra a do normality. Móžnosć, dostawaś pódpěrowanje za dwójorěcnosć na zjawnych pokazkach, jo južo móžno było, ale něnt njedajo wěcej telik běrokratiskich śěžkosćow, což ako Domowina a Rada za serbske nastupnosći w Bramborskej witamy. Z tym dostanu komuny wěcej njewótwisnosći a mógu na krotšych drogach dwójorěcnosć zawopšawdniś.K tomu pśiźo, až wót zachopjeńka togo lěta we wšych wokrejsach sedleńskego ruma głownoamtskich zagronitych za serbske nastupnosći (SPN; CB; OSL; LDS) mamy a ze signalom, až kraj financěrowanje pśewzejo dawa nam a našym wokrejsam lěpše móžnosći se wó serbske nastupnosći staraś. Weto mamy se teke dłujkolětnym cesnoamtskim zagronitym za serbske nastupnosći źěkowaś, dokulaž su ze swójim pilnym źěłom pokazali, kak trjebny jo toś ten rozsud był, dokulaž nadawki su wobstawnje pśiběrali. Naźejamy se, až teke wokrejs Sprjewja-Nysa toś to městno zagroniteje za serbske nastupnosći zasej ako połne źěłowe městno zarědujo.”