Na posedźenju prezidija Domowiny srjedu wječor we Wojerecach je so wo planowanej wustajeńcy „Łužiscy Serbja a powěsćowa postawa Krabat” w Praze kónc junija informowało. Koronakrizy a hač do njedawno zawrjenych hranicow dla je planowanje njewšědnje krótkodobne, konkretny termin hišće doskónčnje wobkrućene njeje. Referent za kulturu třěšneho zwjazka, Clemens Škoda, kulturny wjeršk w čěskej stolicy zhromadnje ze Serbskim muzejom Budyšin, Załožbu za serbski lud / Serbskej kulturnej informaciju, Krabatowym towarstwom a zastupnistwom Sakskeje w Praze přihotuje.Jednaćel Marko Kowar informowaše wo dojednanju mjez zarjadom a zawodnej radu wo aktualizowanju dźěłoweho porjada jako konkluziju ze nazhonjenjow z korona-pandemiju. Z tym ma so nachwilne dźěło doma (homeoffice) po potrjebje z jasnymi regulemi zrjadować. „Normalita” wšědneho dnja pak wostawa prezenca přistajenych Domowiny w zjawnje přistupnych běrowach, dokelž steji bjezposrědnja socialna komunikacija w srjedźišću dźěławosće narodneje organizacije. Klětuša hłowna a wólbna zhromadźizna Domowiny budźe po planje 27.3.2021. Referent za hospodarstwo, Pětr Brězan, je jako městnosć Slepjanski kulturny centrum namjetował, so na přihódny poskitk a serbski raz tuteje rumnosće złožujo. Prezidij poruča zwjazkowemu předsydstwu, tomu sćěhować a, jeli budu hišće postajenja wotstawka dla korony, ličbu wobdźělnikow wuměnjenjam přiměrić. Na dnjowym porjedźe steješe tež rozmołwa prezidija z Markom Suchym, nowym předsydu Rady za serbske naležnosće Sakskeje. Suchy dopominaše w zwisku z aktualnymi wužadanjemi na to, zo je so substanca Serbstwa dotal w stawiznach při kóždej změnje struktury we Łužicy bytostnje znižiła. Zo njeby to zaso so stało, dyrbjeli wšě serbske gremije za jedyn postronk ćahnyć. Wo tym bě na wuradźowanju přezjednosć. Předwidźane je dojednanje mjez serbskej radu a třěšnym zwjazkom wo praktiskej kooperaciji. Tak by Domowina jako zastupjerka zajimow Serbow po serbskim zakonju serbskej radźe takrjec serbsku poziciju přidźěłać móhła, jeli je rada wot sejma abo knježerstwa wužadana, k naćiskam zakonjedawarstwa a ćišćenkam zapósłancow resp. frakcijow stejišćo zabrać. Předsyda Domowiny, Dawid Statnik, kiž je sam z čłonom serbskeje rady, „stringentne postupowanje” Sucheho wita: „Smy zakład kooperacije za legislaturnu periodu pjeć lět kładli a smy sej wo směrje přezjedni. Nam njeńdźe wo abstraktne prawniske debaty, ale cyle konkretne kročele na dobro serbskeho kubłanja, serbskeje kultury a serbskeje rěče w zjawnym rumje. Při tym móžemy so mjez sobu wužadować, zo njebychmy w kole teptali.”Nic naposledk je prezidij dnjowy porjad posedźenja zwjazkoweho předsydstwa 19. junija w Slepom schwalił (předhlad temow slěduje w nowinskej zdźělence pjatk). Marko Hančik, městopředsyda Domowiny a předsyda wuběrka za ciwilnu towaršnosć, předstaji naćisk naprašnika čłonom zwjazkoweho předsydstwa. Zaměr je přepruwowanje a polěpšenje efektiwneje dźěławosće gremija na zakładźe nazhonjenjow jeho čłonow.