Štwórtk, 31.3., so w Budyskim Serbskim domje zastupjerjo wuběrka wěcywustojnych Europskeje rady z Domowinu zetkaja. Kaž hižo loni při wopyće podobneje delegacije w Choćebuzu a wokolinje, kotraž so tehdy k dodźerženju rjadowanjow ramikoweho dojednanja naprašowaše, dźe tón raz wo zwoprawdźenje Europskeje charty regionalnych abo mjeńšinowych rěčow. Wobaj dokumentaj stej wažnej měznikaj europskich předpisow k škitej mjeńšinow a ludow.

Ze stron wuběrka su so Nataša Gliha Komac ze Słowjenskeje, Beate Sibylle Pfeil z Němskeje, Igor Lakić z Čorneje Hory a Adina Nichifor ze sekretariata wuběrka wobdźělili. Domowinu su předsyda Dawid Statnik, městopředsyda Hartmut Leipner, jednaćelka Judit Šołćina a referentce za kubłanje a spěchowanje dorosta, Katrin Suchec-Dźisławkowa, a za gremijowe a ministerialne naležnosće, Julia Kahlowa, zastupili. Najwobšěrniši dypk dnjoweho porjada wuměny informacijow běše tema kubłanje. Dalše temy běchu nałožowanje serbšćiny we wobłuku medijow, zarjadnistwa, póšta a před sudnistwom, sposrědkowanje wědy wo Serbach na šulach wšěch zwjazkowych krajow a prašenja změny strukturow.

Předsyda Domowiny, Dawid Statnik, so wo zetkanju z ekspertami Europskeje rady wupraja:

„Wězo nas wjeseli, hdyz Frizojo Europskej radźe situaciju Serbow jako přikład mjenuja, a njech je na polu tak mjenowanych zjawnoprawniskich medijow http://www.friesenrat.de/inside/pr/2022/20220328_PM_coe.pdf. To na dołhodobnje skutkownu mjeńšinowu politiku Domowiny a serbskich gremijow pokazuje. Najebać to mamy runja Frizam Europskej radźe wšelake ,twarnišća’ sposrědkować, kotrež su wuraz brachow při zdźerženju serbšćiny. Tak je powołanska šula w Budyšinje wjacore směry wukubłanja kaž pjekarstwo přisadźiła, štož je serbskim rěčnym rumam w rjemjesle na škodu.

Wjeselimy so, zo eksperća Europskeje rady so přeco zaso za aktualnym połoženjom awtochtonych mjeńšin tež w Němskej wobhonjeja, tak su so na přikład dźensa konkretnje prašeli, hač je so na problematice pobrachowacych wučerjow za serbsku wučbu zašle tři lěta něšto změniło. Přezjedni smy sej, zo maja so rěčne znajomosće šulerjow prawidłownje po mjezynarodnym standardźe přepruwować, zo bychmy efektiwitu a deficity našeho kubłanskeho systema zwěsćili. Tak smy na to skedźbnili, zo je wuwučowanje serbšćiny na niwowje cuzeje rěče na šulach nam dotal lědma nowych rěčnikow za komunikaciju wšědneho dnja wunjesło.

Na dobrym puću je wočiwidnje reforma prawa mjenow w Němskej – tule na zakładźe politiskich signalow wočakujemy, zo w běžnej wólbnej periodźe na zwjazkowej runinje k wobkedźbowanju žónskich sufiksow w hamtskim wupokazu dońdźe. Ale hišće zdonkonjane njeje, tohodla je derje, zo Europska rada tež tute prašenje kedźbliwje dohladuje. Dźensniši wopyt mjezynarodneje delegacije fachowcow je zaso wuznam zjednoćeneje demokratiskeje Europy za serbski lud wobkrućił.”

Wobraz: Dawid Statnik, Adina Nichifor, Beate Sibylle Pfeil, Natasha Gliha Komac, Igor Lakić, Julia Kahlowa, Judit Šołćina (w.l.) po rozmołwje w Serbskim domje na Póstowym naměsće. Foto: Domowina/Marcel Brauman