Dźensa je Domowina we wosom lokalnych wudaćach Wochenkuriera za wjac hač poł miliona domjacnosćow po cyłym serbskim sydlenskim rumje na swoje dźěło za to serbske jako jónkrótnosć Łužicy skedźbniła. Hesło nawěška je „Bei uns ist die Heimat zu Hause“, wězo dwurěčne, w Braniborskej delnjoserbsce z „Domownja jo pla nas doma”, w Sakskej hornjoserbsce z „Domizna je pola nas doma”. Nawěšk je na braniborskim boku ze Serbskim domom w Choćebuzu, na sakskim boku ze Serbskim domom w Budyšinje ilustrowany.Zdobom so na internetnu stronu Domowiny pokazuje, hdźež steji trojorěčne aktualne wosebite wudaće „Naša Domowina”. Wone so mjez druhim wjerškam lěta kaž 75. róčnicy wozrodźenja třěšneho zwjazka Łužiskich Serbow, wuznamjenjenskemu zarjadowanju za spožčenje Myta Domowiny a čestnych znamješkow a wobzamknjenju wokrjesa Dubja-Błota za spěchowanske čłonstwo w Domowinje wěnuje. Nimo toho namakaja čitarjo pokiw na wubědźowani ze serbskej tematiku.Pod napismom „To smy my” móža so zajimcy ze strukturu, dźěławosću a zaměrami Domowiny zeznajomić. Předsyda Domowiny, Dawid Statnik, w zawodnym nastawku Łužičanow hižo w titulu přeprošuje, „hromadźe po puću za přichod našeje rjaneje Łužicy być“. Hladajo na změnu strukturow we wšěch dobach wón piše: „Tež my Serbja nochcemy ,stare časy’ wróćo měć, kotrež hustodosć dobre časy njeběchu.” Na kóncu artikla je poskitk: „Štož je z mojeho wida to najwažniše: Ludźo we wsy a w swojej štwórći sami postajeja, što to serbske jim konkretnje woznamjenja. Při tym smy jako bazodemokratiska organizacija Wam rady poboku.”Motiw nawěška w Braniborskej:https://twitter.com/domowina/status/1330151905130065920/photo/1Motiw nawěška w Sakskej: https://twitter.com/domowina/status/1330151905130065920/photo/2Wosebite wudaće „Naša Domowina 2020”: https://www.domowina.de/fileadmin/Assets/Domowina/Mediathek/Nasa_Domowina/nasa_domowina_2020.pdf