Zwjazkowe předsydstwo (ZP) Domowiny je na swojim posedźenju pjatk, 27.1., wječor w Kulturnej fabrice we Wojerecach wobzamknyło, wutworić na zakładźe płaćiweho jednanskeho porjada nachwilny dźěłowy wuběrk „Załožbowa rada“. Do wuběrka powołachu so Susann Šenkec, Julian Nyča, Marlis Młynkowa, Bjarnat Cyž, Hartmut Leipner a Dawid Statnik. Nachwilny wuběrk ma nadawk, nětčišu dźěławosć Załožboweje rady a strukturu Załožby za serbski lud ewaluować. Zdobom maja so, wobkedźbujo dotalne namjety a koncepcije, zwjazkowemu předsydstwu lětsa hač do nowemberskeho posedźenja předpołožić dopóznaća a namjety, kotrež aktualne wuwiće a nadawki załožby wobkedźbuja. Po słowach předsydy Domowiny Dawida Statnika móže so wuběrk wo dalše wosoby rozšěrić.

Pozadk rozsuda je rezimej dźěławosće gremija w dobje 2019 – 2023, kiž podachu čłonki a čłonojo Załožboweje rady na posedźenju zwjazkoweho předsydstwa loni w nowembrje. Wjacori čłonojo rady wuprajichu so za to, wo strukturje Załožboweje rady a załožby sameje znowa rozmyslować. Serbscy radźićeljo Załožboweje rady njejsu samostatny organ, ale jenož dźěl cyłkowneho organa Załožboweje rady. Za zhromadne dźěło z druhimi gremijemi měł so serbski cyłk w Załožbowej radźe w přichodźe hinak organizować, resp. konstituować.

Na spočatku wuradźowanja powita předsyda Domowiny, Dawid Statnik ,18 čłonow ZP, kotřiž běchu prěni raz po pandemiji wšitcy na městnje přitomni. Woporow nacionalsocializma wopominachu čłonojo ZP z mjeńšinu ćišiny.

Wojerowčan a zdobom čłon župneho předsydstwa župy “Handrij Zejler”, Werner Sroka witaše přitomnych do, po swojich słowach, “stolicy srjedźneje Łužicy”. Zdobom wuži składnosć dopominać na Jana Haješa-Łazowskeho. Lětsa wopominaja so jeho 150. posmjertne narodniny. “Njedyrbimy jenož na naše najwažniše wosobiny myslić ale tež na našich regionalnych.”, tak Sroka.

Prěni dypk dnjoweho porjada běše předstajenje projekta Domowiny w ramiku strukturneje změny, t. mj. Projekt “ZARI – syć za regionalnu identitu a serbsku rěč”. Projektowa managerka, Diana Pawlikowa, a wědomostna sobudźěłaćerka w projekće, Cordula Ratajczakowa, předstajištej wobsahi dosć wobšěrneho projekta k rewitalizaciji serbskeje rěče. Štyrjo rěčni motiwatorojo Hornjeje Łužicy běchu na městnje přitomni a so čłonam ZP předstajichu. Cil projekta je, měć hač do lěta 2100 cyłkownje 100.000 aktiwnje serbšćinu rěčacych. Hladajo na so hobersce zdawacy cil wuwjedźe wědomostnica Ratajczakowa, zo su tež druhe mjeńšiny a luby w Europje podobnje postupowali. Mjenowaše w tutym zwisku Walizow a Ladinčanow.  

Na dnjowym porjedźe steješe dale diskusija wo dźěłowych směrnicach Domowiny za dobu 2023-2025. Diskusija wotmě so w formje “World café” za šěsć blidami. Zajimcy při blidźe za hospodarstwo naspomnichu na přikład, zo ma so wo strategijach přemyslować, kak serbski dorost do Łužicy wabić. Firmy měli so w serbskich prašenjach lěpje podpěrać. Při dalšim blidźe staji so prašenje, hač ma Domowina na wěčne być zarjadowar mjezynarodneho folklorneho festiwala. Namjety maja so nětko z pomocu zarjada kwalifikować. Wuslědki předstaja so w přichodnym posedźenju Zwjazkoweho předsydstwa. Wo nimi wobzamknyć ma hłowna zhromadźizna.

Dale słyšachu čłonojo rozprawu wo dźěławosći zarjada za lěto 2022 a jón jednohłósnje schwalichu. Jednaćelka Judit Šołćina wuzběhny, zo su tam zawjazane zaměrowe dojednanja kotrež ma Domowina ze Załožbu za serbski lud. Na přikładach rysowaše jednaćelka dźěło zarjada. Tež zwěsći, zo bě lěto Zejlerja a Kocora přewšo zajimawe a wuspěšne lěto w koordinaciji Domowiny. Serbske institucije, kaž tež mnoho towarstwow, gremijow a skupinow su lěto wobohaćili. Wuzběhnje tež Europeadu, hdźež wobdźěli so wšoserbske mustwo. Wjeršk na politiskej runinje bě posedźenje sakskeho kabineta loni z ministrami a ministerkami a dalšimi statnymi sekretarami w Serbskim domje. Nawjazujo na to, so dalše rozmołwy z ministerkami a ministrami přewjedu.

Dalšej dnjowej dypkaj běštej lětuši plan dźěławosće zarjada a hospodarski plan Domowiny za lěto 2023.

Přihoty za Hłownu zhromadźiznu Domowiny 22. apryla, kiž budźe w starej chemijowej fabrice w Choćebuzu, běža po planje. Prezidij rozprawnistwo přihotuje. Towarstwa su do kónc januara prošene rozprawy přidźěłać.

D. Statnik informowaše čłonow tohorunja, zo je we wuslědku zašłeho posedźenja ZP prawiznik pruwował, hač su so wólby załožboweje rady po předpisach towarstwoweho prawa a předpisach Domowiny prawje přewjedli. Po wuwjedźenjach prawiznika su wólby płaćiwe. Wotewrjene je hišće prašenje, hač dyrbi so štwórte městno zastupowaceho čłona załožboweje rady wobsadźić. Tute prašenje nasta, dokelž njedocpěchu zbywace tři kandidaća při wólbach trěbnu ličbu hłosow, zo by so štwórte městno zastupjerja wobsadźiło. Próstwu, pruwować, hač dyrbja so wšitke štyri městna zastupowacych čłonow rady wobsadźić, je Domowina na Załožbu za serbski lud posrědkowała. Wotmołwa hišće njepředleži.

Po dochadźe wotmołwy slěduje dalše wothłosowanje w gremiju.