Domowina, Zwjazk Łužiskich Serbow, dźakuje so wjetšinje wolerkow a wolerjow w Sakskej, kotřiž su so přećiwo ekstremistiskim a populistiskim stronam rozsudźili. Tola cyłkowny wólbny wuslědk je hladajo na stawizny brizantny. Starosćimy so jako Serbja a Domowina – jako jeje třěšna organizacija – wo přichod regiona, Němskeje a Europy. Wysoka ličba hłosow za prawicarskoekstremistiske a populistiske strony woznamjenja chutne wužadanje za našu demokratisku towaršnosć.

Jako narodna mjeńšina w Němskej, w Sakskej kaž tež w Braniborskej, smy jako serbski lud wot tutych politiskich wuwićow wosebje potrjecheni. Zesylnjenje prawicarskoekstremistiskich mocow zbudźa ćěmne dopomnjenki na zašłosć a wohroža zakładne hódnoty našeje towaršnosće.

Serbja su bytostny wobstatk Němskeje a Łužicy a budu so dale ze wšej mocu za měrliwu, demokratisku a mnohostronsku politiku w našim kraju zasadźeć. W tutym zmysle je prezidij Domowiny jednohłósnje wobzamknył, wšitke demokratiske mocy doraznje namołwjeć, krajnemu knježerstwu pod wobdźělenjom AfD zadźěwać. Zhromadne dźěło ze stronu, kiž so w dypkach swojeje programatiki křesćanskim hódnotam a čłowjeskim prawam znapřećiwja a kiž je wot wustawoškita jako prawicarskoekstremistiska zastopnjowana, njeje za Domowinu opcija.

Zasadźujemy so ze wšěmi mocami dale za zdźerženje wotewrjenosće, mnohostronskosće a pluralitu, w kotrejž móža wšitcy – njewotwisnje wot swojeho pochada, rěče abo kultury – we wěstoće a dostojnosći žiwi być.