Krótko do wozjewjenja kónčneje rozprawy komisije “Rozrost, strukturna změna, dźěło” (tež brunicowa komisija) zetkaštaj so ministerski prezident Braniborskeje dr. Dietmar Woidke a ministerski prezident Sakskeje Michael Kretschmer we Wojerecach z Łužiskim kołom. Nimo zastupjerjow komunalneho zwjazka a zastupjerjow wokrjesow Łužicy běše tež předsyda Domowiny, Dawid Statnik přitomny. “Strukturna změna njeje jenož prašenje dźěłoweho městna. Mamy to jako cyłotny proces potrjecheneho widźeć.”, tak Statnik. Dale pokaza na wažnosć, zo so strukturna změna wědomostnje přewodźuje. “Bjez toho”, tak Statnik, “njeje móžno, běžne wuwića kmanje reflektować.” Dale pokaza tež na situaciju Serbow: “Njejsmy jenož tradicija a turistiska atrakcija, smy žiwy lud. 100 lět brunicy woznamjenjeja za nas wjac hač 130 zhubjenych wsow a tysacy wot čłowjekow, kotrež su swoju domiznu a serbsku rěč zhubili.”. W dotalnej mjezyrozprawje komisije so mjez druhim zwěsći, zo je so serbski lud přez aktiwity wudobywanja brunicy we łužiskim rewěrje wosebje poćežowało a zo je to měło wulke wuskutki na prócowanja Serbow k zdźerženju swojeje kultury a identity. Statnik apelowaše na komunalnych zastupjerjow, zo měli tež tutón wažny aspekt strukturneho wuwića wobkedźbować. Domowina wočakuje, zo měli so konkretne naprawy k spěchowanju serbskeje rěče a identity do spěchowanja zapřijeć. Statnik k tym: “Wjetši dźěl loga Łužiskeho koła je w barbach serbskeje chorhoje. Njezabudźće to při Wašich jednanjach.”