Na spočatku „hybridneho” posedźenja zwjazkoweho předsydstwa (ZP) Domowiny pjatk wječor – połojca wobdźělnikow na žurli Serbskeho domu w Budyšinje a połojca digitalnje  – su so čłonojo gremija oficielnje z jednaćelom Markom Kowarjom rozžohnowali, kiž je so kónc lěta na wuměnk podał. Předsyda Domowiny, Dawid Statnik, jemu so jenož za „wuběrne dźěło” njedźakowaše, ale tež za jara derje organizowany přechod k naslědnicy. Jako dar su čłonojo ZP Kowarjej wšelake wěcki za warjenje přepodali. Kowar přeješe ZP dale wjele wjesela a dosć wuspěchow za spomóžne wuwiće Serbstwa w přichodnych generacijach. Wón je dale zarjadej z něšto hodźinami tydźensce poboku.

Nawjazujo na telefonat jednaćela Ludoweho nakładnistwa Domowina (LND), Symana Pětra Cyža, informowaše předsyda Domowiny wo napjatej personelnej situaciji w serbskim nowinarstwje, wosebje w redakciji Noweho Casnika (NC). Tam pytaja hišće dweju redaktorow za bórze wakantnej městnje. Statnik skedźbnješe na to, zo dźe tule tež wo wuchowanje rěčneho ruma, a apelowaše na serbsku zjawnosć, při pytanju personala pomhać, tež dźěło na honorarnej bazy je móžno. Šefredaktor Serbskich Nowin (SN), Janek Wowčer, wotrjadnik LND za nowiny a časopisy, wudospołnješe, zo pobrachuja za NC tohorunja kapacity za redigowanje a přełožowanje. Tola tež pola SN z namakanjom noweho personala klaca: Bohužel tež na tři wupisanja SN za stilizatora dotal so nichtó přizjewił njeje.

Na naprašowanje SN, kotre stejišćo Domowina k nastorkej Maćicy Serbskeje zabjerje, wo změnje serbskeje hymny w jednym dypku diskutować, je čiła debata nastała. Město poslednjeje sady „Ow, zo bychu z twojeho klina wušli mužojo, hódni wěčnoh wopomnjeća!” namjetuja „Njech nam z klina twojeho wuńdu žony, mužojo, hódni wěčnoh wopomnjeća!” Dawid Statnik wobkrući swoju hižo w lońšim hodownym postrowje zwuraznjenu poziciju, zo by tajka změna načasna a woprawnjena była. Runja njemu witachu dr. Hartmut Leipner, Lubina Dučmanowa, Jan Clausen, Marja Michałkowa, Jan Bělk a Damian Dyrlich tutu diskusiju. Přiwšěm jewješe so konsens, zo je moderacija diskusije pola Maćicy Serbskeje w dobrych rukach, wšako njeńdźe wo politiski resp. takrjec hamtski rozsud, ale wo mjezsobne dorozumjenje Serbow w běhu wobšěrneje diskusije.

Bytostny rozsud je zwjazkowe předsydstwo hladajo na spěchowanje serbskich wulkoprojektow w Sakskej w ramiku změny strukturow tworiło. Domowina wobkrući swoje stejišćo, zo maja župy w poradźowacym gremiju při wobhospodarjenju srědkow přez Załožbu za serbski lud zastupjene być. Wotpowědne mjena chce třěšny zwjazk postajić, kaž su sej to tež póndźelu zastupjerjo serbskich gremijow žadali. Prezidij Domowiny dóstanje nadawk, proces wothłosowanja mjez regionami koordinować. W Braniborskej su sej hižo na šěsć serbskich wulkoprojektow dojednali.

Zwjazkowe předsydstwo so prawidłownje ze situaciju w regionach zaběra. Tak rozprawješe tón raz Sonja Hrjehorjowa, regionalna rěčnica za teritorij župy „Handrij Zejler” wo połoženju Serbow we Wojerowskich kónčinach na polu kubłanja, kultury a towaršnostneho žiwjenja. Woni maja štyri Domowinske skupiny a jednotliwcow něhdyšich skupin, rejowanske skupiny, drastowe towarstwa, chóry a wjele starodawnych domizniskich stwow, zdźěla hižo reaktiwizowanych. Na wšelakich šulach regiona serbšćinu wuwučuja, na Wojerowskej wyšej šuli dotal nic; tule so župa za to zasadźuje, zo budźe přichodnje znajmjeńša cyłodnjowskich poskitkow. Mjeztym pjeć rěčnych kursow noweho docenta RCW za dorosćenych, Mareka Krawca, su nimo dotal wobstejacych bjesadow na Horach a we Wojerecach wulke wobohaćenje. Prjedy su narodne drasty wjetšinje ludźi najsylniši faktor serbskeje identity byli, přiběracy zajim za wuknjenje rěče wužiwa župne předsydstwo za projekty, kotrež pěstowanje nałožkow z tworjenjom rěčnych rumow zwjazuja.

Dale je so gremij rozprawje RCW a zarjada Domowiny wo lońšej dźěławosći a jeju dźěłowemu planej za lětsa wěnował. Nawodnica RCW, dr. Beata Brězanowa, předstaji postup při certifikowanju delnjo- a hornjoserbskich rěčnych kmanosćow. Tak budźe na přikład w Sakskej móžno, wot šulskeho lěta 2022/2023 staw rěčneho niwowa šulerjow po 8. lětniku ewaluować. Potom steješe hospodarski plan 2022 na dnjowym porjedźe. Na kóncu zjawneho posedźenja su hišće personelny rozsud tworili: delegowanje třoch zastupjerjow do Mjeńšinoweje rady Němskeje. Woni wolichu předsydu Domowiny Dawida Statnika, jednaćelku Judit Šołćinu, jako zastupjerku Hornjeje Łužicy, a Kita Elu jako zastupjera Delnjeje Łužicy. Zdobom dźakowaše so Zwjazkowe předsydstwo dotalnemu čłonej gremija Bjarnatej Cyžej za dołholětne a swěrne dźěło w mjeńšinowej radźe. W krótkej rozprawje hódnoćeše woznam rady a rjekny, zo ze spočatka, potajkim z časa přewróta, gremijej přisłušeše.

Zwjazkowe předsydstwo poruča župam a towarstwam, hybridnu wurjadnu hłownu zhromadźiznu z małym delegatnym klučom za zaručenje płaćiwosće modernizowanych wustawkow přewjesć, kotrež je lońša hłowna zhromadźizna w Slepom wobzamknyła. Tak chcedźa wobmyslenjam ze stron towarstwoweho registra hamtskeho sudnistwa w Drježdźanach w jednym dypku wotpowědować, dokelž to tuchwilu płaćiwosći wšěch změnow zadźěwa (štož wobsah nastupa, hlej prošu zdźělenku dnja 17.1.2022: https://www.domowina.de/hsb/medijowy-wobluk/blog/premysluja-wustawkow-dla-wo-wurjadnej-hlownej-zhromadziznje-1830).