Jedna z wudźěłkow „Dźěłarnički přichoda Łužicy” bě brošurka: LAUSITZ | ŁUŽYCA | ŁUŽICA: DIE SORBEN/WENDEN– VERBINDEN DIE LAUSITZ, redakcionelne dźěło měještej Domowina a Serbski institut na starosći: zwl_broschuere_sorben_wenden.pdf (zw-lausitz.de). Tuta je srjedź lěta w nakładźe 5.000 eksemplarow wušła. Mjeztym běše wona rozebrana. Wulkeho zajima dla su brošurku hišće raz produkowali, a wotnětka Domowina ju zaso rozdźěla. Wot 10.000 eksemplarow druheho nakłada je hižo 7.500 rezerwowanych. Štóž ma zajim za ćišćane eksemplary, njech so wobroći na sekretariat Domowiny: sekretariat@domowina.de , tel. : (03591) 550 102. Brošurka je darmotna.Tež dalše papjery a studije „Dźěłarnički přichoda Łužicy”, projekta „Hospodarskeho regiona Łužica”, su online přistupne: Downloads rund um die Zukunftswerkstatt Lausitz (zw-lausitz.de)Pětr Brězan, referent Domowiny za hospodarske a infrastrukturelne naležnosće a ze stron třěšneho zwjazka zamołwity za wobsah a rozšěrjenje brošurki, so k aktualnemu stawej zhromadneho dźěła na dobro perspektiwow regiona wupraja:„Dźěłarnička přichod Łužicy“ je zasłe lěta dosć spomóžnych strategijow nadźěłała, tež „Inowacija přez tradicije – serbski potencial za změnu strukturow Łužicy wužić” a „Kulturna strategija Łužica 2025”, w kotrejž serbski lud bytostnu rólu hraje. Smy so jako serbska ciwilnotowaršnostna organizacija rady a intensiwnje na tutym procesu wobdźělili, kiž měješe mjeztym swój wjeršk w doskónčnym dokumeńce „Wuwićowa strategija Łužica 2050”, kotraž so tuchwilu wokrjesnym sejmikam předstaja. Smy so njedawno zaso we wodźenskim wuběrku dźěłarnički schadźowali a zwěsćili, zo wobhladujemy tute zjimanje wupłoda našeje dźěławosće jako „dźěłowu papjeru”, kotraž ma so přichdnje dale wobdźěłać a wudospołnić. Ćim wažnišo je, zo hranicy zwjazkoweju krajow přesahowaca kooperacija klětu dale póńdźe – najebać zakónčenje „Dźěłarnički přichoda Łužicy” kónc lěta. Domowina so jako cyłołužiska organizacija za to zasadźuje, zo so tež dale zetkawamy a wo přichodźe našeje domizny diskutujemy.