Srjedu (2.2.) nawječor je so wuběrk Domowiny za naležnosće změny strukturow, hospodarstwo a infrastrukturu skonstituował. Čłonojo gremija wuzwolichu dr. Hartmuta Leipnera jako předsydu wuběrka a Dianu Maticowu jako městopředsydku. Leipner je tež městopředsyda Domowiny, Maticowa županka a regionalna rěčnica w Slepom. Wuběrkej je ze stron zarjada třěšneho zwjazka referent Pětr Brězan poboku. Na swojim prěnim wuradźowanju w nowej wólbnej periodźe je so wuběrk na ćežišća dźěławosće dojednał, mjez druhim podpěru za wjac dwurěčnosće w hospodarstwje a projekty w ramiku změny strukturow, kotrež rewitalizaciji rěče we wšěch regionach Łužicy słuža.