Dźensa a jutře – 6. a 7. julija - su Chrósćicy hosćićeljo XIII. mjezynarodneho folklorneho festiwala. Hižo w 12.30 hodź. wotměj so zjawny kulturny forum w “Jednoće”, hdźež chce so Domowina wuměnjeć z kulturnymi skupinami wo prašenju, kak stat abo zjawnosć jich kulturne dźěło spěchuje.

Pokazki do imaterielneho kulturneho herbstwa narodow skića wosebity program, kiž zahaji so w 15 hodź. na Koklic dworje. Na dalšim dworje předstajeja tohorunja wot 15 hodź. dorostowe skupiny z Łužicy swoje zamóžnosće. W samsnym času wotewrja na nawsy wiki tradicionelneho rjemjesła. W 17 hodź. slěduje program Serbskeho ludoweho ansambla na farskim dworje, prjedy hač potom wot 19 hodź. programy na burskich statokach slěduja. Wězo su so tež wšitcy z kulinariskimi wosebitosćemi na hosći přihotowali. Z “Chróšćan specialitu” (wot 23 hodź.), zhromadnym swjećenjom, dźeń wuklinči.

Wčera běchu Hochozy wuběrni hosćićeljo lětušeho folklorneho festiwala. Mjez druhim wupraji krajny rada wokrjesa Sprjewja/Nysa Harald Altekrüger swoje wysoke připóznaće. Programy pokazachu na štyrjoch jewišćach a swjećachu hač do nocy.