Gódowny cas lažy pśed nami a zawěsće tek Wy swěśiśo - w zgromadnosći, we familiji abo tek ceło za sebje - gódowne dny a z tym naroźenje Jezusźiśetka.Kuždy gótujo to na swóju wašnju. A kuždy namakajo we swójej wašni “swój swěźeń”, “swóju tradiciju” abo “swóju zgromadnosć”. Gaž na to spominam, dopominam se cesto na wobraze Měta Nowaka Njechorńskeho. Sławny Serb a wuznamny serbski mólaŕ, jo se naroźłi pśed 119 lětami w Njechornju. Znate su wšakorake jogo mólby powěsćowych figurow – kobołśikow, pśezpołdnice a wódneho muža. Tek wjelike wokno ze serbskimi nałogami w Budyšyńskem Serbskem domje jo wón, naš mólaŕ z lipowym łopjenkom, nacerił.Cogodla? Jo wam znate, až jo Měto Nowak-Njechornski tek napórał mólby Bóžych naroźenjow? Jo Bóžu tšojku ceło jadnorje “zeserbšćił”. Raz jo to była Maś Bóža w drastwje katolskich Serbow, raz Wórjejskich stronow abo z Dolneje Łužice. Wósolika jo změnił do krowy a janźelka do kobołśika.Mam to za kšasnu mysl. Kśesćijański nałog naroźenja Chrystusa jo nam stakim blišy a wósobinski – ceło, ako to wót doma – z našeje Łužyce znajomy.Gódy su něco ceło wósobinske a mamy cas se ku kóńcoju chylece lěto wugódnośiś.Tek my w Domowinje zglědujomy na zajźone lěto. Jo to było lěto połne źěła. W měrcu jo se wótměła głowna zgromaźina Domowiny, we wólbach do krajneju sejmowu Sakskeje a Bramborskeje smy se wuspěšnje procowali wó źiwanje na serbske zajmy, na Serbskich wjacorach smy z Wami diskutěrowali wó nastupnosćach, kótarež Was pótrjefiju, za cas Folklorneho festiwala jo była Łužyca zasej jawišćo cyłego swěta a w Liberecu jo se wótwóriło Serbske lěśe 2019/2020. Za wšykne toś te zarědowanja jo wjele pomocliwych rukow trjebnych, což w paźe zastojnstwa Domowiny groni: mało luźi wjelgin wjele źěła. Źěkujom se na tom městnje wšyknym pomocnikam a pśistajonym Domowiny. Bźez Was a wašeje procy njeby kšywowy zwězk taku wuspěšnu źěłabnosć do statka stajił.Teke naše towaristwa, župy a kupki su pilne byli a wjele zarjadowanjow pśewjadli, na kótarež su sebje cesto tek gósći ze jsy pśepšosyli. W Našej Domowinje smy cytali na pśikład wó wjelicnem projekśe Domowinskeje kupki Slěpe, źož su dwě lěśe na zestajenju a pśigótowanjach fotoweje wustajeńce serbskich swajźbow we wósaźe źěłali. Ansamble a kupki su wóswěśili jubileje. Župy a towaristwa su se wobźělili na sakskem idejowem wuběźowanju a su tek pó toś tej droze pśipomagali, až se zjawnje wěcej na serbske nastupnosći a na serbsku rěc źiwa. W nowembrje jo skóncnje serwisowy běrow za komuny w serbskem sedleńskem rumje Sakskeje swójo źěło zachopił.Źěkujom se Wam, lube Domowinaŕki a lube Domowinarje, za wšu wašu procu a pódpěru. Wy sćo rěp serbskego ludu a kužde wašo statkowanje jo rownocasnje wuznaśe žywego serbskego ludu.Jo pak tek wjele njewidnego źěła w slězynje. Wjele rozgronow, pósejźenjow, terminow a zmakanjow. Nastajenje pósuźenjow, twórjenje pozicijow a posrědnjenje serbskego měnjenja jo nadawk, kótaryž Domowina wšednje wugbajo – lěc w Budyšynje, Chóśebuzu, Worjejcach, Slěpem, Drježdźanach a Podstupimje, w Berlinje abo w Brüsselu. Zakład togo jo tek źěłabnosć cłonkow Zwězkoweho pśedsedaŕstwa Domowiny. Tek cłonkam gremija cu se wutšobnje źěkowaś za wšu procu a radu. Njelicne góźiny a młogi wjacor inwestěruju do cestnoamtskego źěła. Wuslědk wšogo togo móžo se daś wiźeś: Pśipóznaśe serbšćiny a wědobnje, až ma se na serbski lud pśi rozsuźenjach źiwaś, źeń a wěcej stupa. Jo to pšawy směr – połny źěła – ale jo dobry, a naźejam se, až dalej zgromadnje pó toś tej droze kšacamy. Za to Wam žycym kšutu strowosć a wšo to nejžlěpše.Co wócakujo nas w pśiducem lěśe?W maju móžómy wóswěśiś 75. wrośenicu znowazałoženja Domowiny w Chrósćicach. Buźo to zawěsće wjeliki wjeršak.2020 wobźělijo se kupka Serbowkow a Serbow na Europeadźe w Awstriskej pla Korutańskich Słowjencow. Wjaselijom se, až mamy skóncnje šyršy zakład za wutwórjenje našeju mustwowu. Žycym jim južo źinsa wjele wuspěcha.A wjaselijom se na dalšne Serbske wjacorki a wuměny z čłonkojstwom a serbskim ludom. Južo źinsa cu Was pśepšosyś, aby nam gronili, co was wobśěžkujo, kake ideje maśo a co derje běžy. Za kuždu myslicku smy źěkowne a na kužde rozgrono se wjaselimy.W mjenju Domowiny – Zwězka Łužyskich Serbow žycym Wam radosne a gnadypołne gódowne dny. Žycym Wam strowotu, měrny cas a wjele mócow do nowego lěta.Waš pśedsedaŕ Domowiny, Dawid Statnik