Hłowna a wólbna zhromadźizna župy „Michał Hórnik” so pjatk, 23. jutrownika (apryla), w 18 hodź. w Chróšćan „Jednoće” wotměje. To je župne předsydstwo srjedu wječor wobzamknyło. Wo tym informowaše Katharina Jurkowa, regionalna rěčnica, a prosy čłonske towarstwa a skupiny, kotrež hišće njejsu delegatow pomjenowali, to najpozdźišo hač do 12.4. nachwatać. Delegaća dóstanu delegatnu mapu a dokładniše informacije hakle po tym, zo je nowy wukaz Sakskeje wo škiće před koronu wušoł, kiž budźe wot 19.4. płaćić.  Na zhromadźiznje chcedźa młodźinskej klubaj z Pančic-Kukowa a Konjec/Šunowa do župy přiwzać. Dale budźe so župne předsydstwo wolić.  Katharina Jurkowa: „Dyrbjachmy hłownu zhromadźiznu župy pandemije dla přestorčić. Nětkole pak chcemy ju tež hladajo na so bližacu hłownu zhromadźiznu třěšneho zwjazka přewjesć. Jutry smy widźeli, zo je z dobrym hygieniskim konceptom wjac móžno. Trěbne testowanje budźe župa organizować a wo tym w přeprošenju informować.”