Přichodna hłowna a wólbna zhromadźizna župy „Handrij Zejler” Wojerecy so pjatk, 17. septembra, w 18 hodź. w załoženskim domje Domowiny wotměje, na žurli „Kulturneje fabriki” při torhošću stareho města. Na dnjowym porjedźe steja po rozprawje župneho předsydstwa a diskusiji wólby župana, městožupana a dalšich čłonow noweho předsydstwa župy. Prěni raz chce župa swoju hłownu zhromadźiznu ze simultanym tołmačenjom přewjesć, zo bychu wjac Domowinjanow regiona do sobudźěła zapřijeć móhli. Wutoru nawječor je so župne předsydstwo w bróžni Wojerowskeho domu Domowiny schadźowało a župnu hłownu zhromadźiznu přihotowało.