Krótko do hód su so wobdźělnicy prěnjeho kursa programa DOMOJ w Budyšinje zetkali, zo bychu so zeznali a wo nazhonjenjach w “serbskim swěće” wuměnili. Zdobom předstaji so při tutej składnosći Jadwiga Brězanowa, kotraž je wot spočatka lěta jako docentka přistajena a budźe wot apryla w „rěčnym hnězdźe” we Wulkich Zdźarach – tam so kurs přewjedźe – wuwučować.

 “Sym wjesoła, zo móžu ze swojimi nazhonjenjemi jako wučerka nětko intensiwne kursy za dorosćenych sobu wudźěłać a přewjesć a sobu na tym dźěłać, hornjoserbsku rěč rewitalizować. Zhromadnje móžemy tomu přinošować, tute drohotne kulturne herbstwo zdźeržeć a za přichodne generacije zachować.”, tak docentka Jadwiga Brězanowa.

Kurs dźewjeć měsacy trajaceho, intensiwneho poskitka DOMOJ za nawuknjenje serbšćiny startuje w aprylu. Dwanaće wobdźělnikow a wobdźělnicow  je komisija po přijimowanskej rozmołwje so z kandidatow wuzwoliła. Woni su mjez 30 a 50 lětami stari a pochadźeja ze wšelakich kónčin Hornjeje Łužicy, ze serbskeje hole runje tak kaž z Budyskeho kraja abo kónčiny podłu Klóšterskeje wody. Někotři maja hižo znajomosće serbšćiny a chcedźa rěč po kursu wěsće nałožować. Dalši  chcedźa šansu intensiwneho kursa wužić a sebi swój són -serbšćinu nawuknyć- skónčnje spjelnić.  Kursistki a kursisća  maja sylnu motiwaciju w přichodźe  serbsce rěčeć a  wosebje tež k wožiwjenju rěče přinošować: hač jako žurnalistka, pěstowarka abo informatikarka, w swójbje abo w čestnohamtskim skutkowanju.

Wjace informacije wo programje DOMOJ čitaće tu www.domoj.eu.