Nimale 40 delegatow a hosći zeńdźechu so dźensa na hłownej zhromadźiznje župy “Handrij Zejler” Wojerecy. Zhromadźizna wotmě so w starej šuli w Židźinom. Simultane tołmačenje so němčiny zmóžniła je dr. Beata Brězanowa.

Z rozprawy

Ko-županka Gabriela Linakowa informowaše přitomnych wo župnych aktiwitach w minjenych třoch lětach. Hač serbske čitanja we Wojerowskej bibliotece, serbska hudźba we Łužiskej hali, jutrowne wiki w Nowej Łuce, nalětni swjedźeń w Ćisku, domizniski dźeń abo dalše. W srjedźišću aktiwitow stejachu zhromadnosć, serbska rěč a kultura. 

Tak chcedźa tež w přichodźe pokročować. Županka zwěsći, zo zajim dorosćenych, serbšćinu nawuknyć přiběra. Kursy serbšćiny rěčneho centruma Witaj su jara derje wopytane. Projekt “Via Sorabica Hoywoj” – puć na slědach serbskich stawiznow a prjedownikow we Wojerecach – ma so klětu realizować. Na polu kubłanja prócuje so župa mjez druhim wo dalewjedźenje serbskeje wučby po 4. lětniku. Tež swójbne popołdnjo chcedźa zaso přewjesć a to hišće lětsa. Županka přeprosy přitomnych na přichodne zetkanje 10. nowembra 2024 do Němcow.

Dale wuwjedźe wona, zo su so zwiski k skupinam derje wuwiwali. Najlěpši přikład za dobry zwisk k towarstwam je nowy čłon župy: hłowna zhromadźizna župy “Handrij Zejler” Wojerecy přiwza dźensa jednohłósnje towarstwo “Šulska a domizniska stwa Ptačecy”. W awgusće 2022 je župne předsydstwo towarstwo hižo nachwilnje přiwzało.

Towarstwo wudźeržuje mjez druhim domiznisku stwu, kotraž wo serbskich stawiznach w regionje informuje. Z pomocu bookii-pisaka je mjez druhim móžno, sej informacije při stacijach w muzeju serbsce naposkać. Realizowała je tole rěčna motiwatorka projekta ZARI Marija Šołćic. Nimo toho wuhotuja w Ptačecach dwurěčne mšě.

Wólby noweho předsydstwa
Do wólbow wuwjaza hłowna zhromadźizna dotalne předsydstwo. Předsyda Domowiny Dawid Statnik dźakowaše so čłonkam a čłonomaj za dobre a njesprócniwe dźěło we Wojerowskim regionje: ko-župance Gabrieli Linakowej a ko-županej Marcelej Braumanej, městožupance Lubinje Dučmanowej, Mili Libšowej, Veronice Boswankowej, Soni Hrjehorjowej, Sigrun Nazdalinej a Wernerej Sroce.

Gabi Korchowa, Mila Libšowa, Rolf Hrjehor a předsyda Domowiny Dawid Statnik skutkowachu we wólbnej komisiji. Za županku bu jednohłósnje Gabriela Linakowa wuzwolena, za městopředsydku wuzwoli so Lubina Dučmanowa. Dale buchu do předsydstwa woleni: Weronika Boskwankowa ze Židźina, Joachim Glücklich z Bórkhamora, Sonja Hrjehorjowa ze Sulšec, Sigrun Nazdalina z Wojerec, Susana Rečelina z Kulowca a Sabrina Wagnerec z Čorneho Chołmca.

Na kóncu zhladowaše županka pozitiwnje do přichoda: “Naš nadawk je prěnjotnje, zo smy serbsce žiwi – zo serbšćina a kultura žiwej wostanjetej. Chcemy tež w přichodźe Domowinu jako zastupjerku zajimow Serbow skrućić.”