Domowina změje wot klětušeho nowu jednaćelku: Judit Šołćinu. Wona naslěduje Marka Kowarja, kiž so kónc lěta na wuměnk poda. Zwjazkowe předsydstwo třěšneho zwjazka Łužiskich Serbow je 42-lětnu diplomowu psychologowku na posedźenju pjatk wječor w tajnym wothłosowanju jednohłósnje do zastojnstwa na čole zarjada narodneje organizacije woliło.

Ženjena mać jednolětneho syna běše wot 2013 wjednica Sekretariata mjeńšinow w Berlinje, kotryž zastupuje zajimy štyrjoch awtochtonych narodnych mjeńšin a ludowych skupin w Němskej. Do toho njeje Judit Šołćina jenož powołansce wšelake zamołwite funkcije wukonjała, na přikład pola Młodźiny europskich narodnych skupin (MENS), ale tež čestnohamtsce w Domowinje: mjez druhim dźesać lět jako čłonka prezidija (2011-2021) a 2013-2017 jako městopředsydka Domowiny. Jeje maksima je: „Přewšo rady dźěłam z ludźimi hromadźe. Je mi wulke wjeselo, w teamje zhromadnje z druhimi na dobro narodnych mjeńšin, wosebje Łužiskich Serbow, dźěłać.”

Tuchwilu hišće w stolicy Němskeje bydlaca Serbowka so nětko do Łužicy wróći. W swojej nowej funkciji chce wona „hesło zwjazanowsć rady do srjedźišća dźěławosće našich župow a fachowych towarstwow stajeć.“ Při tym je jej runohódnosć hornjo- a delnjoserbšćiny jara wažna. Tež intensiwniša zwjazanosć serbskich institucijow jej na wutrobje leži. Z Domowinu čuje so Judit Šołćina hižo z časa dźěćatstwa a młodźiny zwjazana, pozdźišo wědomje přez angažement we wšelakich čestnohamtskich zastojnstwach.   

Hižo dotal je wona „zarjad Domowiny zeznała jako kompetentny, stajnje k zhromadnemu dźěłu wotewrjeny a z fachowej wědu wobsadźeny zarjad. Wěm sej to wažić a wjeselu so, zamołwitosć za Domowinski zarjad přewzać směć. Zakład budu mi programatiske a praktiske zaměry Domowiny a wosebje wězo wobzamknjenja hłowneje zhromadźizny a zwjazkoweho předsydstwa.”

Šołćinje poboku je zastupowacy jednaćel Marcus Końcaŕ w Choćebuzu. Jeho zrěčenje su čłonojo zwjazkoweho předsydstwa na pjatkownym posedźenju wo dalšich sydom lět podlěšili.

Jednaćelka ma dźěławosć zarjada nawjedować a koordinować. Zarjadniskemu wjednistwu přisłušeja nimo jednaćelki a zastupowaceho jednaćela nawodnica Rěčneho centruma WITAJ a tuchwilu pjećo referenća (za kulturu a wukraj, za hospodarske a infrastrukturelne naležnosće, za kubłanje a spěchowanje dorosta, za naležnosće třěšneho zwjazka a za zjawnostne dźěło), bórze šesćo, hdyž so referent za komunalne, gremijowe a ministerialne naležnosće přidruži. Tón swoje dźěłowe městno w Choćebuzu změje, nowinski rěčnik a wosobinski referent předsydy dźěła we Wojerecach, druzy su w Budyšinje zaměstnjeni. Dale ma jednaćelka koordinacija dźěławosće sydom regionalnych rěčnicow, třoch projektnych managerow a dalšich sobudźěłaćerjow kaž motiwatorow za nałožowanje serbšćiny na starosći. Tež wothłosowanje z druhimi serbskimi institucijemi a zamołwitosć za dźěło w euro-regionach słušetej do jeje nadawkow.

Dawid Statnik, jako wot hłowneje zhromadźizny woleny předsyda Domowiny předstajeny jednaćelki a nawodow Domowinje přisłušacych institucijow, so k rozsudej zwjazkoweho předsydstwa wupraja:

„Gratuluju Judit Šołćinej a wjeselu so nad jasnym wotum za nju. To pokazuje na wulku dowěru, kotruž je sej wona ze swojim wjelelětnym angažementom na dobro serbskeho ludu a wšěch awtochtonych narodnych mjeńšin w Němskej nadźěłała. Wosebje sej Judićinu wotewrjenosć we wobchadźenju z najwšelakorišimi wosobami a měnjenjemi wažimy. Trjebamy w Domowinje wjac kultury kreatiwity, regionalneje diwerzity a mjezsobneje inspiracije, časy ,šěreje masy’ su nimo. W zarjadniskim wjednistwje mamy nětko paritu mjez splahomaj, regionalne běrowy su kompletnje w rukach žonow. Judit budźe Domowinu tež ze swojimi nadregionalnymi a mjezynarodnymi nazhonjenjemi wobohaćeć a wuwiwać.”