Na Worklečan serbskej wyšej šuli smědźa za 5. lětnik po lětnich prózdninach jenož jednu rjadownju z 28 šulerjemi wutworić – najebać 32 přizjewjenjow. Tohodla dyrbješe serbska wyša šula we Worklecach na wukaz Krajneho zarjada za šulu a kubłanje štyrjoch šulerjow z gmejny Chrósćicy wotpokazać, jich dyrbjeli starši na Ralbičan wyšej šuli přizjewić. Tomu pak su starši pisomnje znapřećiwili. Hižo w meji su so wjesnjanostaj Worklec a Ralbic, nawodaj potrjecheneju šulow a předsydaj Serbskeho šulskeho towarstwa (SŠT) a Domowiny ze zhromadnym spisom na sakskeho kultusoweho ministra Christiana Piwarza wobroćili a sej wutworjenje dweju rjadownjow we Worklecach žadali.

K aktualnemu stawej so Katharina Jurkowa, předsydka Serbskeho šulskeho towarstwa (ŠŠT), a Katrin Suchec-Dźisławkowa, kubłanska referentka Domowiny, wuprajitej:

„SŠT a Domowina stej potrjechenym serbskim swójbam poboku. Starši maja prawo, so za stejnišćo šule rozsudźić, kiž socialnym stykam jich dźěći najbóle wotpowěduje. Tajki rozsud je tež w zajimje zdźerženja a wuwiwanja rěčnych rumow. Jedna swójba je sej hižo městno na němskej šuli w bliskosći rezerwować dała, jeli při wotpokazanju přizjewjenja we Worklecach wostanje.

Wotpokazujemoj taktiku ministerstwa, brach wučerjow z powjetšenjom rjadownjow statistisce kašěrować. We Worklecach wostanje tež při zrjadowanju jeničkeje rjadownje 5. lětnika po tuchwilnym planje 59 hodźin wučerjow njewobsadźenych, z druhej rjadownju 71. Tohodla trjebamy hinaše personelne rozrisanje, na přikład zasadźenje dotalneje wučerki-studentki jako referendarku a wjac nawabjenja kwalifikowanych přidružnikow za wučerstwo.

Hižo lěta dołho eksistuja ramikowe wuměnjenja koncepta ,2 plus‘ jenož hišće w rjadowakach ministerstwa a hamtow. Runje nětko tež hišće rjadownje powjetšić a z 25 w Ralbicach resp. z 28 we Worklecach zrjadować, prekernemu połoženju serbšćiny njewotpowěduje. Tohodla wočakujemy respekt stata před wolu staršich a přizwolenje 2. rjadownje za 5. lětnik na serbskej wyšej šuli we Worklecach.”  

Katharina Jurkowa (tel.: 0174 30 10 200, e-mail: katharina.jurkowa@domowina.de) medijam po potrjebje kontakt ze staršimi sposrědkuje.