W dźěłarničce „Tradicije wokoło jejka” župy „Handrij Zejler“ stej so štwórtk (17.3.) we Wojerecach dwě kole zajimcow zetkałoj. Wosom žonow z Ćiska, Židźinoho, Wojerec a Nydeje je so zwažiło, zdźěla k prěnjemu razej, pod nawodom Sigrun Nazdalineje a jeje dźowki Annemarie w sydarni domu Domowiny jejka wóskować abo bosěrowali. Zdobom su kursistki Wojerowskich rěčnych kursow z docentom Marekom Krawcom runočasnje we bróžni na zahrodźe wo jutrownych nałožkach bjesadowali a zhromadnje spěwali.

Wo tym informowaše regionalna rěčnica Sonja Hrjehorjowa. Dobreje rezonancy dla chcedźa klětu pokročować. Zarjadowanje je dźěl projekta „regionalna pisanosć rěče, drasty a kultury – žórła serbskeje identity”, mytowaneho we wubědźowanju „Rěč wjaza” Załožby za serbski lud.

Foto: Sonja Hrjehorjowa