Čłonojo Zwjazkoweho předsydstwa Domowiny wola na swojim přichodnym posedźenju dnja 14. decembra w Chrósćicach čłonow rady Załožby za serbski lud kaž tež jich zastupjerjow ze Sakskeje za nowu wólbnu dobu 2019 – 2023. Wólby nawjeduje wólbny wuběrk. Jemu přisłušeja Křesćan Korjeńk, dr. Beata Brězanowa a Kathrin Młynkowa. Zwjazkowe předsydstwo Domowiny bě zjawnje namołwiło, hač do 1. nowembra zapodać namjety za kandidatow. Nětko je wólbny wuběrk wozjewił mjena kandidatow. To su:-             Bjarnat Cyž, Bošicy-             Marko Dźisławk, Njeswačidło/Dobrošicy-             Katharina Jurkowa, Hórki-             dr. Lubina Malinkowa, Rakecy-             Robert Maćij, Hrubjelčicy-             dr. Daniel J. Měrćink, Budyšin-             Marlis Młynkowa, Hórki-             Julian Nyča, Budyšin-             dr. Jürgen Rühmann, Radeberg-             Susann Šenkec, Großenwiehe/Store Vi-             Jakub Žur, Budyšin Tuchwilna wólbna doba rady Załožby za serbski lud skónči so w měrcu přichodneho lěta. Po wustawkach Załožby za serbski lud § 5 wotstawk 2 dypk 1 přisłušeja załožbowej radźe šěsć zastupjerjow serbskeho ludu, z toho štyrjo ze Swobodneho stata Sakska a dwaj z Kraja Braniborska. Kóždy z nich ma měć naměstnika. Na zakładźe protokoloweje noticy k artiklej 7 wotrězk 1 Statneho zrěčenja wo wutworjenju Załožby za serbski lud woli braniborska Rada za naležnosće Serbow zastupjerjow serbskeho ludu z Braniborskeje do załožboweje rady. Serbskej radźe Braniborskeje předleži 12 požadanjow. Kandidaća předstaja so na zjawnym posedźenju serbskeje rady, kiž budźe 15. januara abo 26. februara 2019 – termin hišće zdźěla. W Sakskej woli Zwjazkowe předsydstwo Domowiny po wothłosowanju ze serbskimi zjednoćenstwami serbskich čłonow Rady załožby za serbski lud.