W nejmłodšych koaliciskich jadnanjach jo bramborske krajne kněžaŕstwo swóju pódpěru za serbsku kulturu a dolnoserbsku rěc zwurazniło. “Wjaselimy se,  až jo se źěl pominanjow  serbskego luda, kotarež smy stronam zapódali, wobglědowało ”, zwěsćijo Dawid Statnik, pśedsedaŕ Domowiny – Zwězka Łužyskich Serbow. “Wóstanjo pšašanje, lěc dosegaju w koaliciskem dogronje zapisane napšawy, za dłujkodobny šćit našeje rěcy a kultury we wšyknych žywjeńskich wobłukach.“

Domowina jo politiskim stronam SPD a BSW pominanja Serbow do koaliciskich jadnanjow Bramborskeje pśepódała.

Mjaztym jo se etablěrowanje studiuma ceptaŕstwa serbšćiny za dolny schójźeńk  na BTU Chóśebuz-Zły Komorow pśipowěźeło. Wótwórjone wóstanjo, kak malsnje a w kótarej měrje se toś to póbitowanje natwarja. Něnto jo nadawk kněžaŕstwa, konkretne koncepty wuwijaś, aby se dosć zajmcow za studij w Bramborskej namakali. “Pśi tom buźomy raźi na pomocy” groni Statnik.

Lěcrownož jo se dłujkodobne financěrowanje Załožby za serbski lud pśigroniło, wóstanjo njejasne, kak wusoke buźo spěchowanje załožby w pśiducych lětach. Pśiměrjenje srědkow na stupajuce kosty jo njewuzbytne, aby se doněntejšne, poměrnje nowe a serbsku rěc spěchujuce projekty zdźaržaś mógali.

Teke skšuśenje dolnoserbskich wopśimjeśow sćelaka rbb wóstanjo dalej tema. Pśi tom ma Domowina za wažne, až se teke trjebne personelne resursy k dispoziciji staja, aby se kwalita a trajnosć programa dłujkodobnje zawěsćiła. Wósebnje wažne jo, teke wukubłanje trjebnego fachowego personala na pśikład na pólu žurnalizma spěchowaś.

„Bramborska ma zagronitosć, Serbow nic jano ako kulturnu kšomnu kupku woglědowaś, ale ako wažny a jadnorazny źěl našogo regiona ze swójskimi pšawami, pótrjebnosćami a – ako jo Łužyski monitor zwěsćił – z potencialom” , tak Dawid Statnik.

Pominanja serbskego luda na koaliciske jadnanja Bramborskeje |
Forderungen des sorbischen Volkes an die Koalitionsverhandlungen inBrandenburg (PDF)