K swojim kónclětnym posedźenju zetkachu so čłonojo prezidija Domowiny dnja 05.12.2018 w Drježdźanach. Pod nawodom předsydy Domowiny Dawida Statnika přihotowachu přichodne posedźenje Zwjazkoweho předsydstwa, na kotrymž maja so mjez druhim wuzwolić serbscy zastupjerjo ze Sakskeje za Załožbowu radu na dobu 2019-2023. Dnjowy dypk je wobstatk zjawneho dźěla posedźenja, pjatk, dnja 14.12.2018. Hosćo a zajimcy su wutrobnje witani. Posedźenje přewjedźe so w Chróšćan Jednoće.Dale matej so na samsnym posedźenju delegować dwaj zastupjerjej Domowiny do kuratorija Myta Ćišinskeho na dobu 2019-2025.Zetkanje w Sakskej stolicy wužichu čłonojo gremija zdobom za wopyt zeleneho wjelba. W nim poskićuje so přewod wustajeńcy z pomocu słuchatkow tež w hornjoserbskej rěči. Předsyda Domowiny Dawid Statnik: “Je to zajimawostka a rjane znamjo runohódnosće serbšćiny. Rěčnikaj Beno Bělk a Mónika Gerdesowa wjedźetaj wuběrnje po wustajeńcy drohoćinkow a wosebitosćow. Wopyt so woprawdźe wupłaći.”Přichodne posedźenje Zwjazkoweho předsydstwa Domowiny je pjatk, dnja 14.12.2018 w Chrósćicach.
Přichodne posedźenje prezidija Domowiny je srjedu, dnja 16.12.2018 we Wojerecach.