Marko Kowar, jednaćel Domowiny, so ke konkluzijam narodneje organizacije z aktualizowanych postajenjow zwjazkoweje a krajneje politiki nastupajo naprawy přećiwo rozpřestrěwanju koronawirusa wupraja:„Domowina je so sčasom rozsudźiła, škit strowoty do srjedźišća stajeć, a wšě swoje zarjadowanja hač do jutrow wotprajiła, prjedy hač běchmy k tomu zakonsce nuzowani. Zdobom smy runja wjele druhim angažowanym w Serbach z digitalnymi srědkami k serbskemu žiwjenju pod njewšědnymi wuměnjenjemi přinošowali. Nic naposledk jutry su na jimace wašnje znazornili, so je naše serbske zhromadźenstwo njesměrnje wunamakarske w prócowanju, swoju wosebitosć tež takrjec we wuwzaćnym stawje zwoprawdźeć.Tohodla smy na to přihotowani, zo hač do lětnich wulkich prózdnin žanych Domowinskich zarjadowanjow njebudźe. Wosebje za naše kulturne čělesa a sportowe cyłki je čas korony dźeń a wjetša běda. Tule trjebamy dale wjele kreatiwnych idejow konkretneje solidarity. Njezabudźmy pak tež na hosćencarjow a wšěch dalšich předewzaćelow wšelakich branšow, kotřiž su naše towaršnostne žiwjenje dołholětnje podpěrali a su nětko sami we wulkej nuzy.Fakt pak je: Naše cyłe towarstwowe žiwjenje njedawa so kompletnje na internet a wideja zredukować. Tohodla chcemy wot srjedź meje spytać, krok po krok zetkanja wolenych gremijow w najwušim kruhu a z trěbnym wotstawkom wobdźělenych zmóžnjeć, hdźež so naši čłonojo schadźować chcedźa. Třěšny zwjazk budźe pola regionalneho předewzaća škitne maski skazać, zo by swojich wolenych čestnohamtskich čłonow w tutej ćežkej situaciji podpěrać móhł.”