Na prěnim lětušim wuradźowanju referentow a regionalnych rěčnicow Domowiny w formje widejo-konferency su so woni pod nawodnistwom jednaćela Marka Kowarja na zhromadnu dźěławosć 2021 dojednali. Zahajenje „Lěta župow” składnostnje 100. róčnicy załoženja regionalnych cyłkow třěšneho zwjazka so 24.7. z wotkryćom tafle při Wojerowskim torhošću wotmě. „Lěto župow” steji pod hesłom wuměny mjez ludźimi wšelakich kónčin Łužicy. Hač budźe samsny kónc tydźenja w juliju regionalny swjedźeń w Chrósćicach jako wěste narunanje wotprajeneho folklorneho festiwala, so pandemije dla hakle w měrcu rozsudźi. 20. róčnicu Chróšćan zběžka chcedźa prěni dźeń šulskeho lěta 2021/22 spominać, nimo toho forum z časowymi swědkami wotměć a dokumentaciju wo tehdomnišich podawkach wudać. Wjerški lětušeho serbskeho žiwjenja móhli tež hry serbskeho mustwa na přestorčenej Europeadźe być, kotraž je za čas 19.-27.6.2021 w Korutanskej planowana – jako zhromadne hladanje hrow přez livestream na płachće na łužiskich sportnišćach. Tež „Super-kokot” w Delnjej Łužicy najskerje budźe. Po posedźenju so jednaćel Domowiny, Marko Kowar, wupraja: „Format widejo-konferency pola nas w praksy derje wobsteji: Přetrjebamy mjenje dźěłoweho časa za jězby a wuradźowanje je jara koncentrowane. So wě, zo chcemy so po kóncu pandemije zaso husćišo direktnje zetkawać, ale format digitalneho posedźenja wostanje zawěsće prezentny. Smy sej wědomi, zo tež 2021 ,normalne lěto’ njebudźe. Hruby plan najebać to je, konkretizowanje smy sej za nalěćo po fazy kruteho lockdowna předewzali.”