K wosebje napadnym wuslědkam reprezentatiwneho woprašowanja „Łužica-Monitor” 2022 so Dawid Statnik, předsyda Domowiny, wupraja:

„,Serbska kultura je znamjo jónkrótnosće za region’*, praji 59 procentow ludźi we Łužicy. Z tym je serbske žiwjenje w swojej regionalnej mnohotnosći jako zwjazowace markowe znamjo za cyłu Łužicu wot hórskeho kraja na juhu hač před wrota Berlina připóznate. Přemóžaca wjetšina ludnosće widźi w serbskosći potajkim kluč k zhromadnej identiće. Jenož 19 procentow, potajkim mjenje hač kóždy pjaty, to wotpokazuje.

Wosebje zwjeselacy je nam dalši fakt: Serbska rěč, najwažniše přiznamjo eksistency serbskeho ludu, je do tutoho připóznaća sobu zapřijata: Přihłosowanje k wuprajenju „Dwurěčne wuhotowanje z taflemi w zjawnym rumje w němskej a serbskej rěči přisporja atraktiwitu regiona“** ze 49 procentami podźěl ludźi, kotřiž to wotpokazuja (28 procentow), jasnje přetrjechi. Rozumimy to tež jako podpěru za rewitalizaciju serbšćiny tam, hdźež njebě so jenož pod wliwom brunicoweje industrije ze wšědneho dnja zhubiła.

Zwjazkowy sejm je ze zakonjom wo zesylnjenju strukturow za dotalne wuhlowe rewěry 2020 „zachowanje a dalewuwiwanje rěče, kultury a tradicije serbskeho ludu“ jako integralny wobstatk cyłeje změny strukturow připóznał (artikl 17, čisło 31). Mjeztym dźěłamy na tutym zakładźe w Braniborskej a Sakskej zhromadnje z mnohimi partnerkami a partnerami z nowymi projektami na zwoprawdźenju tutoho nadawka.

Skrućenje serbskosće woznamjenja tež nastork za změnu strukturow. Wšitke jednotliwe infrastrukturne naprawy móža jenož potom cyłkownje połnu skutkownosć za přichod Łužicy wuwiwać, hdyž dawa towaršnostny fundament za cyły region, dorozumjenje na něšto zhromadneho. Serbske žiwjenje skića zdobom łužisku zwjazanosć a lokalnu mnohotnosć – při tym smy wotewrjeni wšěm wobydlerkam a wobydlerjam njewotwisnje wot rěče a pochada.“

w přiłoze wotpowědnu stronu z cyłkowneje prezentacije woprašowanja

*němsce w originalu: „Die sorbische Kultur ist ein Alleinstellungsmerkmal für die Region“

**němsce w originalu: „Die zweisprachige Beschilderung im öffentlichen Raum in deutscher und sorbischer Sprache steigert die Attraktivität der Region“