Nowa jednaćelka Domowiny, Judit Šołćina, witaše štwórtk swojeho naslědnika na čole Mjeńšinoweho sekretariata w Berlinje, Göstu Nissena, a nowej sobudźěłaćerce zastupnistwa awtochtonych mjeńšin w Němskej, Hanku Šołćic a Veroniku Bjarš, do Serbskeho domu w Budyšinje. Domowina je w nadawku narodnych mjeńšin nošer mjeńšinoweho sekretariata.

Hanka Šołćic dźěła jako asistentka, Veronika Bjarš je projektna managerka za pućowansku wustajeńcu „Was heißt hier Minderheit?” wo danskej mjeńšinje, friziskej ludowej skupinje, wo němskich Sintach a Romach, wo serbskim ludźe a plat rěčacych. Tež kurator wustajeńcy, Robert Lorenc, je so na rozmołwje wobdźělił. Woni wužichu składnosć za wólnu wuměnu wo mjeńšinopolitiskich temach, tež z předsydu Domowiny, Dawidom Statnikom, kiž je čłon mjeńšinoweje rady. Wosebje so wjeselachu, zo móžachu skónčnje po třoch lětach přihotow zahajenje wustajeńcy dorěčeć, wšako je prezidij zwjazkoweho sejma za tón wjeršk srjedź měrca w rumnosćach parlamenta zelenu swěcu dał.

Judit Šołćina: „Dźakujemy so wosebje rozprawjerjam frakcijow za temu narodne mjeńšiny w nutřkownym wuběrku za podpěru. Rjenje, zo móže bórze tuta wažna wustajeńca po cyłej Němskej pućować.”  

Wobraz: Judit Šołćina, Robert Lorenc, Gösta Nissen, Dawid Statnik, Hanka Šołćic, Veronika Bjarš (wotl.). Foto: Domowina