Ze słowami “Dajće sebi słodźeć.” wotewri Durinska ministerka za migraciju, justicu a škit přetrjebarjow kaž tež Durinska społnomócnjena přećiwo anticyganizmej a za žiwjenje Sinti a Romjanow Doreen Denstädt (Zwjazk 90/Zeleni) dźensa wječor pućowansku wustajeńcu “Was heißt hier Minderheit?” w Durinskim krajnym sejmje. Wona nawjaza z tym na wuprajenje w saterfriziskej rěči “Minnerhaiden sunt dät Soalt inne Soppe”. My – narodne mjeńšiny – smy sól w poliwce Němskeje a ministerka wuzběhny, zo je tuta “mnohotnosć dar za našu towaršnosć”. Wustajeńca předstaja štyri připóznate mjeńšiny Němskeje: Danow, Frizow, Serbow a němskich Sinti a Romow kaž tež delnjoněmčinu, kotraž je jako regionalna rěč škitana. Ministerka Doreen Denstädt wuzběhny wažnosć wustajeńcy, wosebje w časach, w kotrychž přiběraja hibanja, kotrež mjeńšiny škitać nochcedźa, ale je potłóčować. 

W Durinskej sydla mjez druhim Sintojo a Romojo. W mjenje Centralneje rady němskich Sintow a Romow postrowi zastupjerka Dotschy Reinhardt. Přez wustajeńcu wjedł je Saterski Friza Karl-Peter Schramm, kotryž přitomnych tež w mjenje Mjeńšinoweje rady Němskeje witaše. Při serbskej staciji rozłožowaše referentka za naležnosće třěšneho zwjazka Madlenka Di Sarnowa serbske wobsahi.

Wustajeńca je hač do 5. septembra zjawnosći přistupna, a to wšědnje wot 8.00 hodź. hač do 18.00 hodź. Wosebitu móžnosć skići wopytowarjam dźeń wotewrjenych duri Durinskeho krajneho sejma dnja 2. septembra wot 10 hodź. Dalša stacija wustajeńcy budźe wot 15. septembra w Choćebuskim Serbskim muzeju.

Fota: Domowina/Božena Šimanec

1. Dotschy Reinhardt wita hosći w mjenje Centralneje rady němskich Sintow a Romow.
2. Saterski Friza Karl-Peter Schramm (naprawo) je přez wustajeńcu wjedł. Na wobrazu mj. dr. ministerka za migraciju, justicu a škit přetrjebarjow Doreen Denstädt (2. wotlěwa), wiceprezidentka Durinskeho krajneho sejma Diana Lehmann (3. wotprawa), referentka za naležnosće třěšneho zwjazka Madlena Di Sarnowa (3. wotlěwa).
3. Při serbskej staciji rozłožuje Domowinska referentka Madlena Di Sarnowa (5. wotlěwa) ministerce Doreen Denstädt (4. wotlěwa) a zajimcam serbske pozadki wustajeńcy.