Župne předsydstwo župy „ Michał Hórnik“ Kamjenc je na swojim posedźenju póndźelu wječor w Chósćicach młodźinski klub Konjecy/ Šunow ze 60 čłonami do župy přiwzało. Županka Zala Cyžowa a regionalna rěčnica Katharina Jurkowa so wjeselitej, zo je to hižo štwórty młodźinski klub, kiž je župje přistupił: „To je znamjo stajneho womłódźenja Domowiny w našim regionje a wuraz dobreho zhromadneho dźěła wšěch generacijow.” Aktualnje słušeja do župy „Michał Hórnik“ 1250 čłownow w hudźbnych, kulturnych cyłkach, Domowinskich skupinach a wjesnych a młodźinskich klubach. Foto: Posedźenje župneho předsydstwa ze zastupjerjemi młodźinskeho kluba, w.p. Ewa Čornakec (čłonka předsydstwa), Krystof Hrjehor (předsyda młodźinskeho kluba).