Zašły kónc tydźenja wotmě so molerska dźěłarnička, kotruž je Spěchowanski kruh za serbsku ludowu kulturu organizował. Cyłkownje 12 zajimcow z Hornjeje, srjedźneje a Delnjeje Łužicy kaž tež z Drježdźan su so na njej wobdźělili. Tež lětsa nawjedowaše znata serbska wuměłča Maja Nagelowa wuměłski kónc tydźenja, kotryž wotmě so w něhdyšim Radworskim dwórnišću a tamnišej wokolinje. Nimo serbskich wuměłcow a hižo dołhe lěta swěrnych lajskich wuměłcow móžachu tež někotrych nowačkow witać.  

Pjatk poda so skupinka na wjedźenje přez Radwor z Pětrom Klimanom, kotryž na přewšo žiwe wašnje stawizny wsy a wosebje cyrkwjow rysowaše. Rozestajenje ze stawiznami regiona twori dobry zakład za wuměłske dźěło. Sobotu wječor čakaše wosebitosć na wobdźělnikow. Woni mějachu móžnosć dwě holcy portretować. Danica Hickec bě sej serbsku katolsku dźěłansku drastu zdrasćiła a Hana Šmitec katolsku drastu kemšerki w płachćičce.

W nazymje budźe po zwučenym wašnju wustajeńca wuslědkow dźěłarnički w Serbskim domje w Budyšinje.