Před 25 lětami, srjedu dnja 20. januara 1999, schwali Sakski krajny sejm Zakoń wo prawach Serbow w Swobodnym staće Sakska. Na přeće Domowiny, kotraž přeješe sej centralny zakoń, nadźěła tehdyša frakcija CDU w korespondency z SPD a PDS zakoń ze 17 paragrafami. Předchadźacy serbski zakoń z lěta 1948 zhubi z wozjewjenjom swoju płaćiwosć.

Nimo swobodneho wuznaća k serbskemu ludej, zasadnych prawow za spěchowanje serbskeje identity a wužiwanja serbskeje rěče w zjawnosći, je tež serbske zastupnistwo “třěšneho zwjazka serbskich zwjazkow a towarstwow” rjadowane. Předsyda Domowiny Dawid Statnik: “Ze schwalenjom zakonja před 25 lětami je so Sakska jasnje za Domowinu wuprajiła. Jako třěšny zwjazk so tež dźensa dale wšědnje na dobro serbskeho ludu zasadźujemy.”

link: Prawniske předpisy ke škitej a spěchowanju serbskeho ludu (PDF)