Hišće hač do 30. junija je składnosć, zasłužbne wosoby za lětuše wuznamjenjenje z Mytom Domowiny, z Mytom Domowiny za dorost a z Čestnym znamješkom Domowiny namjetować. Čłonojo župow, towarstwow a tež jednotliwcy su prošeni, swoje namjety za wuznamjenjenje hač do 30. junija 2018 Domowinje zapodać, a to na slědowacu adresu: Domowina - Zwjazk Łužiskich Serbow z. t., Póstowe naměsto 2/Postplatz 2, 02625 Budyšin/Bautzen. Swój namjet móžeće tež z e-mejlku pósłać na clemens.skoda@domowina.de.Z Mytom Domowiny maja so ći počesćić, kotřiž so zaměrnje a wuspěšnje za zachowanje a wozrodźenje serbskeje kultury, wosebje pak serbskeje rěče zasadźuja, kaž starši, kubłarki a wučerjo, dołholětni předsydźa Domowinskich skupin a druhich towarstwow.Z Mytom Domowiny za dorost wuznamjeni so młodostna/y abo skupina, kotraž so na wusahowace wašnje za serbsku rěč a kulturu angažuje.Z „Čestnym znamješkom Domowiny“ připóznawaja so zasłužby w towarstwowym dźěle, zwoprawdźejo program a směrnicy Domowiny.Mytowanski wuběrk prosy wo to, za namjet nowy formular wužiwać, kotryž je na webstronje składowany: http://www.domowina.de/hsb/domowina/wuberki/mytowanski-wuberk. W tutym dokumenće namakaće dalše informacije. Jeli maće k tomu prašenja, móžeće so tež rady direktnje na zarjad Domowiny wobroćić: Clemens Škoda, referent Domowiny za kulturu a wukraj, e-mejlka: clemens.skoda@sorben.com, tel. 03591 550-208.