Hišće hač do njedźele je čas, so na naprašowanju čłonow wšěch serbskich towarstwow a zwjazkow wobdźělić, kiž so tuchwilu w nadawku Domowiny přewjedźe. Dotal je so hižo wjace hač 450 ludźi na naprašowanju wobdźěliło. “Wutrobny dźak wšěm, kiž su nam hižo swoje měnjenje zdźělili. Chcemy hišće wjele wjace ludźi docpěć a přeprošamy, so wobdźělić a na prašenja wotmołwić. Waše měnjenje je nam wažnje!”, tak Marka Cyžowa, předsydka wuběrka za zjawnostne a lobbyjowe dźěło Domowiny.Naprašnik předleži trojorěčnje jako online-naprašowanje runje tak kaž na papjerje. Z dotal něhdźe 250 digitalnje dospołnje wupjelnjenych naprašnikow bu 36 % w němskej rěči, 57 % hornjoserbsce a 7 % delnjoserbsce wotmołwjenych. Starobna zestawa, tak zdźěli agentura Methodenberatung Jahn dźensa, je dobra: połojca ludźi, kiž su wotmołwili, je pod 40 lětami, a połojca z nich je starša hač 40 lět. Tež podźěl muži a žonow je někak wurunany.Naprašowanje je anonymne a přewjedźe so hišće hač do 14. oktobra. Wotmołwy wuhódnoći agentura Methodenberatung Jahn z Lipska. Domowina nima žadyn přistup k jednotliwym wotmołwam. Z naprašowanjom spjelni Domowina jedyn nadawk zašłeje hłowneje zhromadźizny. Wuslědki maja kónc lěta předležeć a so do přihotow klětušeje hłowneje zhromadźizny zapřijeć.Naprašnik je wozjewjeny pod https://www.soscisurvey.de/DomowinaBefragung/ . Zajimcy dóstanu jón tež we wšěch běrowach Domowiny. “Wobdźělće so a zdźělće nam Waše měnjenje”, tak Marka Cyžowa.