Domowina přewjedźe hač do kónca junija 2020 naprašowanje tych zastupjerjow Domowiny, kotrychž je třěšny zwjazk do gremijow wšelakich runin pósłał, zo bychu tam serbske zajimy zastupowali. K tomu so Werner Sroka, referent Domowiny za nutřkowne naležnosće, wupraja:„Zakład za naprašowanje je nadawk dźěłowych směrnicow Domowiny za dobu 2019-2021, w kotrymž rěka, zo analyzuje so hač do klětušeje 20. hłowneje (wólbneje) zhromadźizny Domowiny zastupnistwo Domowiny w druhich towarstwach, gremijach a funkcijach. Na digitalnym puću su serbscy zastupjerjo wot předsydy Domowiny wotpowědnu próstwu wo pisomnu rozprawu wo swojim skutkowanju a naprašnik dóstali.Mjeztym steji za nich tež na internetnych stronach třěšneho zwjazka tutón naprašnik k dispoziciji. W rubrice mediateka ma so wobłuk „dokumenty” wočinić a tam „dźěłowe směrnicy” a „naprašnik” nakliknyć.https://www.domowina.de/hsb/domowina/wustawki-prawniske-predpisy/dzelowe-smernicy/naprasnik/Třěšny zwjazk wupraja wšitkim, kotřiž w mjenje Domowiny druhdźe čestnohamtsce serbske zajimy zastupuja, wutrobny dźak a wysoke připóznaće. Wočakuje wot naprašowanja zajimawe wuprajenja ke skutkownosći zastupnistwa a k wosobinskim nazhonjenjam delegowanych ludźi.Za tych, kotrychž su župy a čłonske towarstwa/zwjazki Domowiny do gremijow pósłali, njech župne a towarstwowe předsydstwa tajku analyzu přewjedu. Za zastupjerjow Domowiny w šulskich konferencach přewozmje to kubłanski wuběrk Zwjazkoweho předsydstwa Domowiny.” Do tutych gremijow (nimo šulskich konferencow) sćele Domowina jako třěšny zwjazk zastupjerjow:

• EBLUL-komitej Němskeje
• CIOFF Němska z.t.
• Mjeńšinowa rada Němskeje
• Dźěłowy kruh za mjeńšinowe prašenja při zwjazkowym sejmje
• Poradźowacy wuběrk za prašenja serbskeho ludu pola BMI
• Załožbowa rada
• Serbska rada Sakskeje
• Rozgłosowa rada RBB
• źěłowa kupka “serbske kubłańske temy” MBJS
• Rewitalizaciska seś
• Regionalna zgromaźina regionalnego planowanskego zgromaźeństwa “Łužyca-Błota”
• Euroregion Sprjewja-Nysa-Bobr
• Zwjazkowa zhromadźizna regionalneho planowanskeho zwjazka “Hornja Łužica – Delnja Šleska”
• wodźenski wuběrk Dźěłarnički přichoda Łužicy
• koordinaciski kruh za strukturne wuwiće Hornjeje Łužicy
• rozsudźacy wuběrk za LEADER-region Hornjołužiska hola a haty
• Towarstwo k wuwiću krajiny Hornjołužiska hola a haty z.t.
• Sakski krajny wustaw za priwatny rozhłós a nowe medije
• wodźenska skupina 2plus
• Krajna kubłanska rada Sakskeje
• wuběrk za socialnosć, strowotu a pšawa mjeńšynow města Chóśebuz
• wuběrk za kubłanje, sport, kulturu a serbske nastupnosći města Chóśebuz
• wuběrk za młoźinsku pomoc města Chóśebuz
• wuběrk młodźinskeje pomocy wokrjesa Zhorjelc
• wuběrk młodźinskeje pomocy wokrjesa Budyšin
• kuratorij Myta Ćišinskeho
• jury Myta Zejlerja
• Brunicowy wuběrk Kraja Bramborska