Dźensa su w „Kompetencnym centrumje za załožerjow a přemysło industrijneho parka Čorna Pumpa” finalny staw papjery „Strategija wuwića Łužicy 2050” předstajili. Na nim su nimale tři lěta wosoby z Łužicy a „Dźěłarnička přichoda Łužicy” (ZWR) sobu pisali. Wodźenski wuběrk ZWR je so dźensa w Čornej Pumpje schadźował. Zastupjerjo z kruha awtorow su jednotliwe jednanske pola a jich ćežišća rozkładli. Hotowu papjeru chcedźa kónc lěta němsce, serbsce, pólsce, čěsce a jendźelsce wozjewić. Marko Kowar, jednaćel Domowiny, so k tomu wupraja: „Bytostne poselstwo strategije za přichod Łužicy je: Wjacerěčnosć budźe realita wšědneho žiwjenja we Łužicy a wuraz jeje profila wosrjedź Europy. Serbski lud jako tradicionelnje dwurěčny hraje při zwoprawdźenju jónkrótnosće našeho regiona centralnu rólu. To woznamjenja wulka zamołwitosć a zdobom historiske wužadanje.”Mjez awtorami su mjez druhim nawodnica Rěčneho centruma Witaj, dr. Beata Brězanowa, dr. Madlena Malinkec, referentka za serbske naležnosće w Sakskim statnym ministerstwje za wědomosć, kulturu a turizm, Dr. Fabian Jacobs ze Serbskeho instituta a ze stron Domowiny Frank Kosyk a Pětr Brězan. We wodźenskim wuběrku samym je třěšny zwjazk Serbow z jednaćelom Markom Kowarjom a referentom za hospodarske a infrastrukturelne naležnosće, Pětrom Brězanom, zastupjeny.Při pisanju strategiskeje papjery poboku běchu jim z poradźowacej funkciju Měto Nowak, referent Krajnego zagronitego za nastupnosći Serbow w Bramborskej, Sabrina Kuschy a Kerstin Kossack, zagronitej za nastupnosći Serbow wokrejsow Dubja-Błota a Sprjewja-Nysa, a Julian Nyča, čłon załožboweje rady a Serbskeje rady Sakskeje. Papjeru budu nětk wokrjesnym sejmikam a zwjazkowemu předsydstwu Domowiny předstajeć. Doskónčne zarjadowanje budźe 4. decembra w Chóśebuzu.