Hižo poł lětstotka wobsteji Serbski folklorny ansambl w Slepom. Tutón jubilej su minjeny pjatk   hódnje woswjećili. Čłonojo ansambla njepěstuja jenož serbsku hudźbu, serbski spěw a hraće na serbskich instrumentach, ale woni prezentuja při swojich wustupach tež serbsku drastu Slepjanskeho regiona. 

Tež Domowina so gratulantam přizamknje a wupraji wšitkim čłonam ansambla swój dźak.

“Znate serbske huslički njejsu na zbožo jenož relikt stareho časa. Prawidłownje móžemy třitrunate husle a tež dalše serbske instrumenty při koncertach a wustupach Serbskeho folklorneho ansambla Slepo dožiwić. Smy hordźi, zo mamy we Łužicy serbski ansambl, kotryž tak angažowany našu kulturu pěstuje. Za to wuprajam w mjenje Domowiny najwutrobniši dźak.

Čłonkam a čłonam Serbskeho folklorneho ansambla Slepo njesłuša pak jenož dźak a připóznaće za jich wusahowacy wjelelětny angažement na polu serbskeje kultury. Wuprajam jim tež wutrobny dźak za njesprócniwe a naslědne dźěło na polu dorosta. Njesebičnje woni swoju wědu dale posrědkuja a z tym dźěćom a młodźinje wosebitosće kultury srjedźneje Łužicy zbliža. Serbski folklorny ansambl Slepo je wažny zdónk našeje serbskeje lajskeje hudźby.”

Čłonojo Serbskeho folklorneho ansambla Slepo Jadwiga Mudrina, Siegfried Holz a Wolfgang Kotissek buchu w lěće 1998 za swoje čestnohamtske skutkowanje z Mytom Domowiny počesćeni.