W Rakecach su woni pomnik za sowjetskich a pólskich wojakow tak wobnowili, zo je zaso stary napis widźeć: „1946 von sorbischen Studenten errichtet, 1980 erneuert”. K tomu so Katja Liznarjec wupraji, regionalna rěčnica župy „Jan Arnošt Smoler” Budyšin:Smy na iniciatiwu serbskeho spisowaćela Křesćana Krawca, župneho předsydstwa a Domowinskeje skupiny Rakecy 8. meje składnostnje 75. róčnicy kónca druheje swětoweje wójny při tutym pomniku na wuswobodźerjow spominali. Bjez nich by serbski lud zahinył, kotremuž su knježacy fašisća rěč, kulturu a organizacije zakazali. Tohodla je serbska studowaca młodźina sowjetskim a pólskim wojakam pomnik twariła, wědźo, zo je wjele młodych muži z Pólskeje a ludow sowjetskeho zwjazka swoje žiwjenje tež za přežiwjenje serbskeho ludu woprowało.Po štyrceći lětach pak bohužel na tučasnym pomniku tón fakt hižo spóznajomny njeběše. Dźensa tomu zaso tak je – Domowina so gmejnje Rakecy a jeje wjesnjanosće Swenej Nowotnemu dźakuje, zo staj pawšalne srědki, kotrež gmejny a města serbskeho sydlenskeho ruma Sakskeje w ramiku serbskeho komunalneho programa swobodneho stata wot lońšeho dóstawaja, krótkodobnje za wobnowjenje pomnika wužiłoj. To je po zhromadnym spominanju Domowiny, gmejny a wosady w meji dobre znamjo do přichoda, zo wopominanje serbsko-němskich stawiznow hromadźe pěstujemy – jako fundament za tworjenje zhromadneje Łužicy! Foto: Borbora Felberowa