Wuběrk za politiske a prawniske naležnosće Domowiny je so srjedu nawječor pod nawodnistwom předsydki Katrin Suchec-Dźisławkoweje we Wojerecach schadźował. Čłonojo gremija su za přichodne posedźenje zwjazkoweho předsydstwa třěšneho zwjazka 20. nowembra dalše namjety za změnu wustawkow zdźěłali. Doskónčnje ma klětuša hłowna zhromadźizna rozsudźić. Kaž předsydka wuběrka zdźěli, chcedźa při zestawje zwjazkoweho předsydstwa přichodnje sylnišo ličbu čłonstwa Domowiny w regionach wobkedźbować a sej zdobom towarstwowy princip zdźeržeć. Wo konkretnych namjetach hłownej zhromadźiznje ma zwjazkowe předsydstwo rozsudźić. Dale su so z prawniskimi aspektami přewjedźenja hłowneje zhromadźizny pod wuměnjenjemi pandemije zaběrali – kak móža płaćiwosć rozsudow zaručeć, jeli dyrbjała so zhromadźizna zdźělnje abo kompletnje digitalnje wotměć.