Na swojim dźensnišim 22. rjadnym posedźenju je prezidij Domowiny štyri delegowanja Domowinje přisłušacych towarstwow wobzamknył. Tak wobdźěli so jedna wosoba wot 17. do 21. julija 2023 w mjenje młodźinskeho towarstwa Pawk na 4. zetkanju młodych rěčnikow minorizowanych rěčow. Dale wobdźěli so Serbska rejowanska skupina Smjerdźaca wot 10. do 13. awgusta 2023 na mjezynarodnym festiwalu w serbiskim Obrenovac a wot 01. do 03. septembra 2023 na mjezynarodnym festiwalu w čěskim Chrudimje. Nimo toho wobdźěli so kulturna skupina Serbska reja wot 01. do 03. septembra 2023 na lětušim “Wendentag” we Wendlandźe. Prezidij wita, zo je so dźěławosć kulturnych skupinow po času korona-pandemije zaso wožiwiła a normalizowała.

Dale planuje prezidij wobdźělenje Serbow na lětušim FUEN-kongresu, kotryž wotměje so wot 07. do 10. septembra w madźarskim Pécs.

Nastupajo wólbow 4. serbskeho naměstnika ze Sakskeje za Radu Załožby za serbski lud dorozumichu so čłonka a čłonojo prezidija na wólbny porjad, kotryž namjetuja zwjazkowemu předsydstwu k schwalenju. Tež čłonow wólbneho wuběrka budźe prezidij zwjazkowemu předsydstwu namjetować. Nimo toho je prezidij namjet za dnjowy porjad 12. rjadneho posedźenja zwjazkoweho předsydstwa, kotrež wotměje so dnja 30.06.23 w Choćebuzu, wobzamknył. Ćežišća tutoho su mjez druhim přihot přichodneho financneho zrěčenja Załožby za serbski lud wot 2026, přihot wólbow 4. naměstnika do Rady Załožby za serbski lud kaž tež termin 23. hłowneje zhromadźizny Domowiny w lěće 2025. Z dočasnym planowanjom maja župy a towarstwa lěpšu móžnosć, so na hłownu zhromadźiznu, kotraž budźe zdobom wólbna zhromadźizna, přihotować.